Non hai dúbida de que o regreso á competición do Deportivo ABANCA non está sendo o desexado. É certo que a incrible tempada do ano pasado xerou unhas expectativas moi altas, pero levar cero puntos nos cinco primeiros partidos non o agardaba nin o afeccionado máis pesimista. Este domingo (18:00 horas) na Primera Iberdrola reciben ao Sevilla no Estadio RIAZOR – ABANCA, un campo que trae moi bos recordos ás deportivistas. Haberá ‘Efecto Riazor’?
Este será o segundo partido oficial que disputarán As Nosas deportivistas como locais en Riazor. No primeiro as coruñesas gañaron ao Valencia por 7-2 nos octavos de final da Copa da Raíña e amosaron un fútbol de alto nivel. Que mellor incentivo para recuperar sensacións que volver a onde un foi feliz.
Coa vitoria ante o equipo Che rematou definitivamente o debate sobre a idoneidade de xogar nun campo das dimensións e as características do recinto coruñés.
As xogadoras de Manu Sánchez están sobradamente preparadas para adaptarse a calquera tipo de superficie e en Riazor poden aparecer eses espazos que agora non se están atopando. Por exemplo, unha xogadora como Athenea, que debe ser diferencial este domingo e xa o foi na Copa da Raíña, terá campo para aproveitar a súa velocidade.
É certo que quizás non sexa o mellor momento. As gradas terán como máximo 150 espectadoras ou incluso poderían rematar por estar baleiras por mor das restrición sanitarias. A As Nosas deportivistas non poderán sentir a calor da afección, algo que se deixa notar máis nun estadio con capacidade para 30.000 persoas que nas gradas da Cidade Deportiva de Abegondo. De tódolos xeitos, a motivación debe estar aí xa que para moitas integrantes do plantel será unha experiencia nova.
Os tres puntos son esenciais para afrontar a próxima semana na que non haberá fútbol para as deportivistas ao aprazarse o encontro previsto ante o Rayo Vallecano. Chegar a ese parón coa mochila de puntos a cero sería unha pesada lousa.
Xogarán en terra de meigas, nun lugar onde se viviron moitas noites máxicas e onde se iniciaron remontadas inesperadas.
