Este domingo, 31 de xaneiro, a localidade catalá de Sant Cugat acolle o XII Campionato de España de longa distancia de natación P50, do que formarán parte varias galegas. En total, nove nadadoras competirán neste torneo estatal, representando a cinco clubs distintos.
Tres delas son do Club del Mar de San Amaro: Nerea Alvite e Ana Veiga nadarán na categoría Senior de 5.000 metros, mentres que Qin Dosil o fará na mesma distancia, pero en nivel Junior.
Tamén tres son as nadadoras que viaxan a Cataluña procedentes do mesmo club, o CN Ponteareas. Iria Lemos participará na proba de 3.000 metros en categoría Infantil, mesma competición na que nadará a súa compañeira Sofía Carballo. En Junior 2, na distancia de 5.000 metros competirá Andrea Domínguez.
Tampouco faltará Alicia Bouzas, do CN Galaico, que participará na proba de Junior 1 5.000 metros, a mesma na que competirá Paula Otero, do CN Arteixo. Estas dúas galegas están entre as favoritas para levar medalla, xa que parten coa terceira e a segunda mellor marca respecitvamente. En categoría Senior estará María de Valdés, do CN Liceo, a segunda mellor nadadora antes da competición.
Debido á situación actual provocada pola pandemia de COVID-19, desde a Real Federación Española de Natación informan que non será posible realizar ningún adestramento nas instalacións do CAR de Sant Cugat antes da celebración do torneo.
Dúas nadadoras galegas quedaron ás portas do torneo
Quenes non lograron clasificarse e quedaron ás portas da competición foron dúas nadadoras galegas: Paula Fariña, do CN Galaico, que quedou a pouco menos dun minuto da última clasificada na categoría 3.000 metros Infantil e Paula Chans, do Club del Mar, cunha marca 14 segundos superior á última clasificada en Junior 2, a súa compañeira Qin Dosil.
Podes consultar o listado completo de participantes nesta ligazón.
Paula Otero, convocada co Equipo Nacional 2024
Ao remate desta competición, a coruñesa Paula Otero, do CN Arteixo formará parte da concentración do Equipo Nacional Junior, Plan 2024, que celebrarase en Las Palmas de Gran Canaria desde este mesmo domingo, 31 de xaneiro, ata o próximo 11 de febreiro.
