A Selección Española de rugby, as Leonas, din adeus ao Mundial de Nova Zelanda. As vermellas, coas galegas Mona Castelo e Paula Medín ‘Alevín’ no seu plantel, quedaron eliminadas no clasificatorio europeo de Parma ao ceder 34-10 ante Italia.
As xogadoras do CRAT Residencia Rialta e as súas compañeiras gañaran a Irlanda por un 8-7 e perderan ante Escocia por un 22-27 antes deste derradeiro partido ante a selección favorita. Con estes resultados, as Leonas quedan fóra tanto do pase directo como da repesca. Tras as tres xornadas, as españolas remataron últimas do seu grupo con 5 puntos.
Despedida amarga do clasificatorio
Antes de disputar o partido ante Italia, as españolas tiñan opcións reais de acceder ao Mundial. Todos os equipos chegaron a esta xornada con cinco puntos, pero só unha vitoria daría ás Leonas o pase. No encontro ante a azzurra, as locais dominaron o control do partido con soltura desde o comezo, marcando o ritmo do partido.
Así, os primeiros puntos foron para as italianas, grazas ás actuacións de Gai e Sillari, protagonistas na primeira metade. No bando das españolas, Mona Castelo foi titular e os puntos chegaron da man de García e Argudo. Na segunda metade ‘Alevín’ substituiu ás súa compañeira no CRAT no terreo de xogo.
Co paso dos minutos, as azuis seguían aumentando a súa vantaxe, cunha inspirada Sillari e cos ensaios de Duca e Madia. Finalmente, cun marcador 34-10, a vitoria quedou en Parma, deixando fóra ás Leonas do ansiado Mundial.
Revive aquí o partido das Leonas ante Italia:
