A Selección feminina de XV non perdía un partido oficial desde o Mundial de 2017. Non foi o día das Leonas, pero tivemos unha boa nova para o rugby galego. Paula Medín ‘Alevín’ foi da partida e xogu como titular. O Estadio Juan Rojas, de Almería, rexistrou unha magnífica entrada e animou sen cesar ás Leonas XV. A pesar do bo ambiente, foi a selección escocesa quen dominou de forma máis regular e levou merecidamente o triunfo por 12-36.
Deste xeito, o equipo de José Antonio Barrio céntrase xa no próximo Rugby Europe Women’ s XV Championship, que se disputará no mes de abril e onde as nosas deben revalidar o título por quinta vez consecutiva a fin de seguir na carreira ao Mundial de Nova Zelandia 2021.
Aínda que con esta derrota perdemos puntos na clasificación de World Rugby, España segue ben posicionada para a clasificación mundialista, por encima de Irlanda e do rival deste domingo, e non moi lonxe de Italia, a cuarta en discordia.
Hannah Smith, MVP
Nos primeiros 40 minutos, un nome sobresaíu por encima do resto, o da centro británica Hannah Smith, un auténtico coitelo que soubo atopar os ocos nas fases aloucadas de xogo aberto e aguantar varios placaxes para sumar dous ensaios en senllas escapadas moi parecidas, unha nada máis comezar e outra ao fío do descanso. Aínda no tramo inicial, onde as escocesas saíron moi enchufadas e foron superiores tanto nos puntos de encontro como na toma de decisións, meteron o segundo ensaio polo á.
Tras o primeiro cuarto de hora de claro dominio visitante, as de Barrio sacudíronse os complexos e comezaron a xogar como elas saben, variando moi ben os xogos de dianteiras e tres cuartos para descolocar á defensa rival, combinado cunha moi boa execución dos mauls marca da casa. A base de insistencia e de boas transmisións, España conseguiu plantarse varios minutos na 22 contraria e tras unha boa fixación con avances de dianteira, Patricia García sacou o balón para abrir o xogo, chegando ata o á Uri Barrutieta, que cun par de quiebros bateu á defensa e sumou a primeira marca. A 10′ de irse a vestiarios, María Calvo dábanos 5 puntos máis tras un golpe sacado rapidamente.
A segunda metade comezou coa mesma tónica coa que arrincou o partido, esporeadas ademais as escocesas tras recuperar á pilier que abandonara o campo por tarxeta amarela. España mantívose firme en defensa, pero o XV do Cardo soubo ser paciente ata ter a súa oportunidade e Leah Bartlett culminou unha contundente serie de percusións para ensaiar e poñer o 12-24 momentáneo. De novo, reaccionou convincentemente o combinado local, con boa achega das xogadoras que entraron desde o banco, especialmente Carmen Rodera, quen asinou varias accións moi notables en ataque.
Conseguiron as nosas Leonas encadear os seus mellores minutos no plano ofensivo a mediados do segundo período, poñendo contra as cordas ao noso rival, que con todo malgastou un despregamento físico impecable para aguantar as constantes acometidas entre o 55′ e o 69′, momento no que Escocia sumou o seu quinto pousado tras un bo contraataque rematado pola explosiva Rhona Lloyd. Non deixou de tentalo o cadro español, pero a claridade e a fortaleza xa non eran as mesmas nos últimos minutos, coas británicas poñendo o broche a un partido moi completo mediante un último ensaio que rubricaba o 12-36.
Nunca gusta perder, e menos cando se acumula un refacho de dous anos sen caer en encontro oficial, pero a pesar da superioridade rival, o noso equipo mantívose unido e mostrou sempre o orgullo innegociable das Leonas, despregando algúns tramos moi positivos nos que hai que profundar. Ademais, as debutantes Amalia Argudo (xa xogara o amigable contra Occitania) e Elisabet Segarra mostraron un gran potencial e desenvoltura para o futuro.
No próximo mes de abril virá o Europeo ante Rusia e Países Baixos e esperemos voltar a contar coa presenza de Paula Medín ‘Alevín’. O equipo español buscará traballar sobre os aspectos para mellorar e procurará volver á senda do triunfo e lograr o seu billete ao Mundial de Nova Zelandia 2021.
