A Selección Española de voleibol, tamén coñecida como as Leonas, competirá no Eurovolley. As xogadoras do combinado vermello, coas deportistas galegas Lucía Prol, Majo Corral e Lucía Varela, con Helia González como capitá, aseguraron a segunda praza do Grupo C.
O pase á competición europea chegaría cunha contundente vitoria 3-0 ante Austria, nun duelo no que as de Pascual Saurín controlaron o ritmo de principio a fin.
Helia González subliña a necesidade de apoio á Selección das Leonas
Co pase ao torneo continental, a capitá do equipo, a galega Helia González, mostrouse contenta pola clasificación e subliñou a importancia do apoio á Selección das Leonas. “Espero que o voleibol español valore todo o traballo que fai este grupo, non só hoxe, senón durante estes últimos anos que nos dan a oportunidade de volver a estar no campionato de Europa”, apuntou.
Helia González: “Para medrar a implicación de todos é moi importante”
González engadiu a importancia que ten participar no Eurovolley para as xogadoras máis xoves: “Que sepamos que é moi importante esta clasificación para a xente xove e é moi importante estar aquí e que todos nos concienciemos de que a Selección precisa máis. Para medrar a implicación de todos é moi importante”.
Al habla la capitana del regreso al #EuroVolleyW. @heliavbol explica la importancia de poner otra vez #RumboalEuropeo pic.twitter.com/iP8Si2CUYK
— RFEVB (@RFEVB) May 13, 2021
A colocadora galega Majo Corral analiza o pase ao Europeo
A galega Helia González non chegou a disputar o partido. Quen si o fixo foi a súa compañeira Majo Corral, quen asegurou que todas as xogadoras estaban “moi contentas” por ter conseguido “o obxectivo, que era gañar a Austria 3-0 e iso da o pase ao Europeo”.
Majo Corral: “Tivemos altos e baixos, pero creo que estivemos máis sólidas no xogo que elas e conseguimos a vitoria”
A colocadora apuntou tamén que durante o encontro “tivemos altos e baixos, pero creo que estivemos máis sólidas no xogo que elas e conseguimos a vitoria, que era o que buscabamos”.
La colocadora @MJcorralbouza valora la victoria de @VoleyFemAbs ante Austria que pone a España #RumboalEuropeo #EuroVolleyW pic.twitter.com/LU4xOV0JiV
— RFEVB (@RFEVB) May 13, 2021
Así certificaron as Leonas o pase ao Eurovolley
O conxunto das Leonas comezou dominando o encontro nos primeiros minutos, controlando ás locais mantendo a distancia con elas. O primeiro set rematou cun 17-25, grazas á actuación de María Segura.
Na segunda manga, as austríacas comezaron controlando o ritmo de xogo e superando ás españolas, chegando ao ecuador do parcial coa vantaxe do seu lado. Isto non freou ás Leonas, que iniciaron unha espectacular remontada desde o bloqueo, dándolle a volta ao marcador deixándoo nun 21-25.
O pase das vermellas ao Eurovolley certificouse no último set. As de Saurín non se viron abaixo coa presión das austríacas, que obrigaban ás españolas a traballar duramente pola vitoria. A igualdade era máxima cun empate a 21, pero nos últimos minutos as visitantes lograron facerse co encontro sellando o trunfo final.
Ao longo deste duelo as xogadoras galegas tiveron unha presenza importante sobre a pista. Lucía Prol foi quen de sumar cinco puntos ás Leonas, mentres que Lucía Varela engadía seis máis. Tamén competiu Corral, que porén non anotou para as españolas.
A próxima cita
Debido a que o equipo de Noruega vén de detectar un caso positivo en COVID-19 no seu plantel, non poderá disputar os encontros programados e o resultado será 3-0 a favor das súas contrincantes.
Así, as españolas non xogarán os partidos programados coas noruegas e só terán que disputar o duelo ante Grecia para completar a fase de clasificación. A cita será este mesmo venres, 14 de maio, ás 17:35 horas. O vencedor deste encontro sera o primeiro clasificado do grupo para o Eurovolley.
