A aventura do Pontevedra Rugby Club esta tempada na División de Honor B está chegando ao seu fin, pero o futuro aínda é unha incógnita. As Irmandiñas xóganse a permanencia, a todo ou nada, na última xornada, contra un Industriales Las Rozas que tamén ten 0 puntos. O duelo será este sábado, 13 de febreiro, ás 18:00 horas.
“O que gana queda, e o que perde, descende”. Así de simple o resume Paula García, unha das xogadoras do conxunto galego. O seu equipo non foi quen de gañar ningún encontro esta tempada, pero a deportista está convencida de que “chegamos ao último con moi boas sensacións e con ganas de demostrar do que somos capaces. Para nos é a nosa final”, sentencia.
Atendendo á clasificación as Irmandiñas son colistas, ao ter unha diferenza de 400 tantos entre os anotados a favor e os recibidos en contra. Pola súa banda, o Industriales está unha posición por riba, cun balance de 19 a favor por 256 en contra.
No seu último partido, na recuperación da segunda xornada co Crealia El Salvador, as madrileñas caeron por un 0-42, pero se levan boas sensacións.
Ao final, todo dependerá do resultado deste encontro que os enfronta, xa que por fin, algún deles poderá estrear o casilleiro da táboa.
As Irmandiñas, listas para vencer ao Industriales Las Rozas
Conscientes da importancia deste partido, no Pontevedra RC levan dúas semanas (a pasada tocou descanso e non competiron) preparando esta “final” e “cargando as pilas a tope”, en palabras de García.
Paula García: “Temos que placar como se fora o noso último partido, fixar o contrario e confiar na compañeira, sempre con cabeza”
A xogadora predí que o duelo estará moi igualado e que “calquera erro pode marcar a diferencia no resultado”. Por este motivo, a concentración será primordial desde o minuto 1, e “placar como se fora o noso último partido, fixar o contrario e confiar na compañeira, sempre con cabeza”.
As súa compañeira Maru Rodríguez coincide en apuntar á intensidade como a clave para ter opcións de vencer. “A idea principal para este partido é ir a por todas. Non temos nada que aforrar, hai que deixalo todo neste partido, xa que será o último da tempada”, afirma.
Por iso, as Irmandiñas teñen xa claras as súas fortalezas e as debilidades como grupo, o que “nos axuda a explotar unhas e compensar as demais”. En poucas palabras, Maru Rodríguez entende esta final como “unha cuestión de actitude, hai que saír ao campo cun só pensamento: as finais non se xogan, gáñanse”.
Maru Rodríguez: “Hai que saír ao campo cun só pensamento: as finais non se xogan, gáñanse”
Pero a xogadora do Pontevedra RC non se esquece de desfrutar, “o que fixemos ata agora. Este partido vainos dar incluso mellores momentos”.
O Pontevedra RC despide a competición
Case sen aviso, ante a renuncia a competir do Muralla, o Pontevedra RC armou en poucas semanas un equipo con xogadoras de toda a xeografía galegas. Sen pretempada, e case sen tempo para que o grupo se formarse, as Irmandiñas comezaron a competir a nivel estatal. Esta semana, polo de agora, remata a aventura.
“Fai pouco máis de tres meses que comezou esta oportunidade de poder competir en DHB, tres meses desde que nos xuntamos naquel primeiro adestramento en Pontevedra case 40 xogadoras de rugby, compañeiras de equipo, caras novas e caras que ata agora so as viras do outro lado do campo disputando un partido. Unha sensación rara por momentos pero que rápido desapareceu. Pronto comezamos a formar equipo, a ter as nosas xogadas, os nosos códigos, a apoiarnos e a crer en nós mesmas”, recorda Paula García.
Pola súa banda, Maru Rodríguez recalca a idea deste último partido como unha final, polo que pode supoñer para o futuro do equipo, pero asegura que afronta esta xornada “con ilusión e enerxía” e que “pase o que pase xa gañamos”.
Maru Rodríguez: “O espírito Irmandiñas non remata aquí, pero botaremos de menos vernos cada semana”
Tamén admite que as xogadoras do Pontevedra RC senten “certa melancolía”, xa que a tempada está a chegar á súa fin, e elas queren máis. “O espírito Irmandiñas non remata aquí, pero botaremos de menos vernos cada semana”, declara Rodríguez.
Paula García engade que estes meses “pasaron demasiado rápido”, polo que coincide en que quedan con ganas de máis. Tamén engade que se a competición contase con partidos de ida e volta, seguramente os resultados serían distintos, e ao mellor non se xogarían todo a un.
O mellor peche sería unha vitoria ante Industriales Las Rozas, “e saber que a próxima tempada podemos ter a experiencia de volver a competir en DHB”. Independentemente do que pase en El Cantizal, “quedamos con todo o que aprendimos, o que melloramos e a xente que coñecimos”.
Ver esta publicación en Instagram
