Se estás afeita ou afeito a entrar a cotío na nosa web, sabes que todas as nosas novas están escritas en galego sempre. Non é cousa dun día. Non será hoxe co gallo do Día das Letras Galegas. Non. É unha decisión editorial que se mantén desde a creación deste humilde medio de comunicación que pretende contar as historias das nosas mulleres do deporte en Galicia.
Desde o xérmolo mesmo desta aposta pola información deportiva en feminino o galego foi concibido coma a lingua vehicular na que iamos trasladar as informacións á audiencia.
Van xa tres anos narrando vitorias, derrotas, ascensos, descensos, medallas, lesións, fichaxes… Todo sempre en galego.
Cando a Federación Galega de Atletismo xunto coa Consellería de Cultura, Educación e Universidade, entregaba a esta redacción o seu primeiro premio foi realmente unha alegría enorme saber que o que se parabenizaba era xustamente a nosa achega á sociedade en termos lingüísticos. No centenario do Atletismo Galego as persoas que conformamos o equipo de As Nosas recibimos con orgullo un premio “ao uso e fomento do galego no deporte”.
Silvia Cameán, directora do Medio Dixital As Nosas, recibe a distinción ao emprego da nosa Lingua Galega pic.twitter.com/XTGTmsTf0k
— Atletismo Galego (@atletismogalego) December 17, 2021
Hai tres anos cando iniciamos en xaneiro de 2020 esta andaina xornalística sabíamos que había demanda de coñecer máis e mellor as historias das Nosas deportistas. Sabíamos tamén que, igual ca elas, a nosa fala, o noso idioma, tiña público que quería recibir información deportiva en galego. Non erramos o tiro.
Máis aló da indexación en buscadores, e dos grandes públicos, elixir a língua galega para comunicar en As Nosas é para nós unha cuestión de coherencia e de compromiso. Poderíamos ser máis grandes en dimensión, pero estamos aquí para ofrecer algo tan diferente como necesario e que conta con demanda.
En As Nosas empregamos un dominio .gal que tamén é unha elección consciente.
Hoxe, 17 de maio, a nosa lingua está de parabéns. A Real Academia Galega homenaxea este 2023 a Francisco Fernández del Riego.
Vaian por diante as nosas desculpas polas grallas lingüísticas que, se cadra, ten este texto e outros que atoparedes neste xornal que, diariamente, informa do papel da muller no deporte en Galicia. Meteremos a zoca, lamentablemente, pero teimaremos en intentar facelo o mellor posible cada día a través das crónicas, as previas, as reportaxes, as entrevistas ou artigos de opinión coma este.
Aquí, en As Nosas, as atletas dan chimpos, as futbolistas fan cambadelas, as deportistas teñen maniotas, as remudas derruban tempos e acadan marcas épicas, e os clubs contan os anos por tempadas. As lesións son no ombreiro, no xeonllo, no pulso, ou escordaduras de nocello, por citar algúns exemplos dos máis comúns. En definitiva aquí, en As Nosas falamos galego.
