As Guerreras do balonmán español estarán en Toquio 2021 e xa coñecen o seu calendario. O Comité Olímpico Internacional, xunto coa International Handball Federation, vén de publicar as datas dos duelos das seleccións para a competición deste verán.
O equipo feminino, coas galegas Paula Arcos e Alicia Fernández nos últimos amigables disputados, iniciará o seu camiño o 25 de xullo. As xogadoras ás ordes do adestrador Carlos Viver que adoita contar tamén no seu equipo co técnico do Atlético Guardés José Ignacio Prades competirán primeiro contra Suecia, disputando a segunda xornada contra Francia, equipo subcampiónde Europa 2020.
Protagonismo galego nas Guerreras co debut de Paula Arcos e Alicia Fernández como máxima goleadora
O terceiro partido será contra Brasil, e o último do mes de xullo terá como rival a Hungría. A participación nesta fase preliminar rematará contra o Comité Olímpico Ruso, o terceiro clasificado no Mundial do 2019.
Datas e horas dos partidos das Guerreras en Toquio
Así, o calendario das Guerreras queda da seguinte forma:
- España vs Suecia – 25/07/21 – 19:30 horas
- Francia vs España – 27/07/21 – 21:30 horas
- España vs Brasil – 29/07/21 – 11:00 horas
- Hungría vs España – 31/07/21 – 19:30 horas
- España vs Comité Olímpico de Rusia – 02/08/21 – 14:15 horas
Estes horarios seguen a zona horaria local, polo que hai unha diferenza de sete horas con respecto a Galicia.
