As Guerreras da Selección Española de balonmán, coa galega Alicia Fernández e a xogadora do Atlético Guardés Paula Arcos nas súas filas, suma a súa segunda vitoria olímpica.
O conxunto español, adestrado por Carlos Viver, logrou vencer a Brasil por un 27-23 (13-13 ao descanso).
Nos primeiros minutos de partido, a Selección Española sufriu varias perdas de balón, e non atopaba o ritmo, sendo superado polas rivais brasileiras. Porén, as contrincantes tamén tiñan problemas en ataque, deixando un marcador parello.
Co paso dos minutos, as Guerreras reaccionaron, pero Brasil apretaba. Con todo, as vermellas foron quen de remontar, chegando ao descanso coas táboas no 13-13.
Tras a reanudación, as españolas tomaron o mando od partido, logrando colocarse por diante das súas competidoras. Cun parcial 5-1 a vantaxe pasaba a un 18-14, que facía presaxiar a vitoria hispana.
Brasil non deu o partido por perdido e seguiu presionando, pero as Guerreras xa eran superiores sobre a pista. As brasileiras estiveron preto de remontar, pero o conxunto español foi superior, para rematar nun 27-23 final.
Neste encontro, a representación galega foi dobre con Alicia Fernández e Paula Arcos, aínda que ningunha acertou fronte a porta.
O seguinte partido de Fernández, Arcos e as Guerreras
O vindeiro encontro para as Guerreras será o 31 de xullo, con Hungría como rival. A cita comezará ás 12.30 horas e disputarase no estadio nacional Yoyogi.
