Non foi posible, o soño do primeiro mundial das Guerreras terá que agardar polo menos outros dous anos, ata o campionato que organizarán conxuntamente Dinamarca, Noruega e Suecia, para que a ansiada estrela poida lucir na camisola nacional.
Aínda resulta cedo para saber se Prades encabezará novamente o plantel español na xélida Xutlandia, mais o que semella cada vez máis claro é que a súa pupila no Guardés e no combinado nacional, Paula Arcos, será unha das referencias para tratar de levar o ouro do fortín das vixentes campioas.
A de Petrer consagrouse nesta cita coma un dos grandes baluartes do noso balonmán nos vindeiros anos. A tan só uns quilómetros da súa casa, a lateral acudía á súa segunda gran cita tras os xogos de Tokio, sen ter apenas cumpridos os vinte anos de idade. A chamada do seu gran valedor no Guardés e agora na selección, José Ignacio Prades, foi unha das sorpresas cando o técnico alacantino fixo publico o listado das 19 xogadoras que participarían no mundial. Non obstante, malia unha feble fase inicial, Arcos demostrou porque está chamada a liderar nun futuro ás Guerreras grazas a un máis que destacado tramo final de campionato.
Pola súa parte, a central de Valdoviño, Alicia Fernández, a pesares de non poder ser da partida nos dous primeiros encontros do campionato por mor dunhas molestias físicas que arrastraba co seu club, o Rápido de Bucarest romanés, acabou afianzándose de novo no eixo da zaga hispana tendo unha notoria participación ao longo de todo o torneo.
Un arranque demoledor das Guerreras
Logo dunha ilusionante posta en escena no Torneo Internacional de España no que o combinado nacional se corou coma campión, o conxunto dirixido por Prades presentábase na sede de Torrevieja para encarar o Grupo H no que quedara emparexado cos combinados de Arxentina, Austria e China.
O debut fronte ás albicelestes non puido ser máis contundente. As Guerreras, pese a un inicio de encontro marcado pola inestabilidade na liña defensiva, souberon sobrepoñerse nunha segunda metade de escándalo para rematar o encontro cun abultado 29-13 a favor.
O encontro ben de seguro foi vivido con especial atención na Guarda, pois ata tres integrantes do conxunto miñoto se deron cita nel, Arcos e Prades na selección española, e a gardamallas bonarense, Marisol Carratú, que pouco, ou nada, puido facer ante as ofensivas locais. Pola súa parte, a lateral de Petrer sumou un único tanto no seu debut no campionato.
Ante o combinado chinés a tónica foi practicamente a mesma. Os axustes defensivos dotaron á zaga dunha maior contundencia que permitiu que as xogadoras dirixidas por Prades puidesen dominar de principio a fin asestando un 18-33 definitivo co que garantir a súa presenza na Main Round. Neste encontro, Alicia Fernández seguiu a ser baixa e Paula Arcos mellorou as súas prestacións convertendo dous goles e acadando o seu primeiro MVP.
A derradeira desputa da fase inicial saldouse cunha nova vitoria por 31-19 fronte a Austria, que regresaba a un mundial doce anos despois, nun encontro que supuxo o debut da central de Valdoviño e no que Arcos volveu a sumar dous novos tantos para o seu casilleiro.
Novo pleno na Main Round
Tras unha primeira fase inmaculada con pleno de triunfos e puntos, as Guerreras afrontaban a rolda principal do torneo cheas de moral aínda que sabedoras de que a nova empresa sería moito máis complexa.
Xapón, Croacia e Brasil serían os combinados que o conxunto adestrado por Prades tería que bater para poder acadar os cuartos de final, unha tarefa nada sinxela para a que foi clave a estelar irrupción de Paula Arcos.
Ante as niponas, a sobriedade defensiva que caracterizou ao conxunto español na fase anterior desapareceu por completo provocando un partido de ida e volta no que Alicia Fernández, con tres goles, e Paula Arcos, como revulsiva, foron claves para garantir un axustado triunfo por 28-26.
Fronte a Croacia, o 23-27 definitivo non reflexou plenamente a comodidade da vitoria dunhas Guerreras que deixaron sen opción ás balcánicas no único encontro no que a lateral do Guardés quedou sen anotar e no que a Valdoviño converteu nunha ocasión.
Co pase a cuartos na man, o combinado nacional mediuse á selección carioca nun trámite que se resolveu cun novo triunfo por 27-24 no que tivo especial protagonismo Alicia Fernández grazas aos seus catro tantos.
As vikingas deixaron sen opcións ás Guerreras
O Palacio de Deportes de Granollers foi testemuña do primeiro chanzo que as xogadoras adestradas por José Ignacio Prades tiveron que superar para meterse na loita polos metais. Fronte a elas estaba nada máis e nada menos que Alemaña, toda unha tetracampioa de Europa que non foi quen de conter ás españolas.
O empuxe inicial das teutonas, sumado á sangría defensiva das Guerreras, fixo vislumbrar un final dramático que nunca acabou por ter lugar grazas en gran medida á aparición no encontro de Paula Arcos, quen con catro tantos facilitou o pase ás semifinais e levou o seu segundo MVP.
✨ ¡ @PaulaArcos10! ❤️
19 años. Cuartos de final de un Mundial en tu país. MVP. Nada más que añadir #Guerreras #SheLovesHandballpic.twitter.com/MYLIENnVhj
— RFEBalonmano (@RFEBalonmano) December 14, 2021
Pola súa parte, Ali Fernández volveu completar un partido sobrio no que dotou de rigor o eixo da zaga hispana e no que logrou anotar tres dianas.
Agardaba nas semifinais Noruega para reeditar a cita de dous anos atrás, aínda que desta vez a fortuna caería do lado das escandinavas.
As campioas non lle deron opción ás Guerreras en Granollers e impuxéronse por 27-21 deixando ás xogadoras dirixidas por Prades á porta da súa segunda final consecutiva.
As opción de medalla disipáronse definitivamente no partido polo terceiro e cuarto posto no que outro combinado nórdico, Dinamarca, acadaría o triunfo por 35-28 impedindo que polo menos o bronce quedase na casa.
Non obstante, malia non acadar recompensa o balance non foi nin moito menos negativo para as nosas deportistas. Á confirmación de Paula Arcos coma unha das grandes promesas do noso balonmán houbo que sumarlle o fantástico papel de Ali Fernández na sala de máquinas do combinado nacional, sendo novamente unha peza fundamental dentro do engranaxe de Prades.
Os habéis vaciado. Lo habéis dado todo representando a nuestro país en casa. Solo nos queda aplaudiros
❤️ ¡ , ́ #Guerreras!#SheLovesHandball pic.twitter.com/UkMvwbERjX
— RFEBalonmano (@RFEBalonmano) December 19, 2021
