Comezo con mal pé para as Guerreras da Selección Española de balonmán, equipo no que compite a galega Alicia Fernández. As vermellas debutaron con derrota por un 24-31.
O conxunto español estreou a súa aventura olímpica ante Suecia, no encontro correspondente á primeira xornada competitiva dos Xogos Olímpicos de Toquio 2020.
As Guerreras non foron rival para Suecia
Desde os primeiros minutos de encontro, Suecia dominou sobre a pista do estadio Yoyogi. A subcampioa do mundo viuse controlada polas rivais, sen chegar a crear serio perigo ao longo do partido.
O alto ritmo do partido perxudicou ás Guerreras, que igualaron o encontro cun 6-6 no ecuador da primeira parte, pero non volverían a achegarse ás contricantes nos minutos restantes. Para o tempo de descanso as suecas vencían por un 9-13.
Na segunda metade o guion non mudou, e Suecia seguiu controlando o mando do partido, chegando facilmente á portería española, e sen conceder erros.
Finalmente, nos minutos finais o partido xa estaba decidido, e nada puideron facer as vermellas por forzar unha remontada. Cun 24-31, as Guerreras deberán sobrepoñerse deste resultado nos vindeiros partidos.
Ao longo deste encontro, a galega Alicia Fernández non chegou a anotar ningún tanto para a Selección Española, pero asinou unha asistencia.
A próxima cita para Alicia Fernández
O seguinte partido das Guerreras e Alicia Fernández terá lugar o martes, 27 de xullo, ás 14:30 horas, con Francia como rival.