O futsal galego trunfa en Primeira División e na Segunda. O subgrupo 1A agrupa a sete equipos da zona norte de España, dos cales cinco son galegos. Trátase do Valdetires Ferrol FSF, Ourense CF Envialia B, Club Deportivo Mosteiro Bembrive, ENCE Marín, A Fervenza FS e o Bloques Cando FSF Castro.
Catro destes conxuntos de futsal completaron xa a primeira volta competitiva. A primeira xornada do 2021, que situaba a competición no seu ecuador, non se puido celebrar na súa totalidade.
O temporal Filomena impediu que os equipos salamantinos se enfrontansen cos correspondentes galegos. Desta forma, na sétima xornada soamente xogaron o Fervenza contra o Castro, con vitoria para as últimas, e o Envialia B contra o Valdetires, que resultou en empate 6-6.
Así, a falta da metade da competición regular, a táboa clasificatoria é a seguinte:
- Valdetires Ferrol FSF (17 puntos)
- Bloques Cando FSF Castro (13 puntos)
- ENCE Marin (12 puntos)
- Ourense CF Envialia B (8 puntos)
- CD Universidad de Salamanca (7 puntos)
- A Fervenza FS (7 puntos)
- Club Deportivo Mosteiro Bembrive (7 puntos)
- CD Inter Sala Salamanca (2 puntos)
O Valdetires lidera a clasificación
O líder invicto do grupo é o Valdetires Ferrol FSF. As xogadoras de A Malata aínda non atoparon un rival que as vencera, e son as claras favoritas para xogar o ascenso.
Tras sete partidos disputados, o conxunto agora dirixido por Fran Toba só cedeu puntos ante o Universidad de Salamanca na segunda xornada e ante as galegas do Envialia B na última disputada.
Tamén fixeron unha boa actuación na Copa da Raíña de futsal. As ferrolás recibiron ao Poio Pescamar, actual subcampión do torneo contra o que caeron nunha eliminatoria moi loitada (1-2). O Valdetires estivo preto de dar a sorpresa, pero a súa aventura na Copa rematou na primeira ronda.
O Fervenza perdeu o derbi, pero non a esperanza
Maior sorte tivo no derbi ferrolán. As de Toba enfrontaronse no partido de ida contra o A Fervenza cun moi bo resultado: 4-1. O conxunto adestrado por Chipi non deu coa fórmula para frear ás líderes na sexta xornada, pero o seu xogo mellorou para a seguinte semana.
O 2021 comezou cunha derrota para as ferrolás do Fervenza, que perderon 3-4 ante o FSF Castro, pero case lograron a remontada. As futbolistas estiveron arroupadas pola súa afección desde a grada e desde distintos puntos, xa que o club retransmite os seus partidos vía Facebook.
Para o que resta de tempada, o Fervenza, que ocupa a sexta posición, debe repetir vitorias como as logradas ante o Universidad de Salamanca e o Ourense Envialia B.
O Envialia forma xogadoras con aspiracións de Primeira División
O filial ourensán segue a formar xogadoras que non deixan de medrar e nun futuro poderían formar parte do primeiro equipo, que compite na máxima categoría.
Malia situarse no medio da táboa, con dúas vitorias, dous empates e tres derrotas, as brancas foron, xunto coa USAL, as únicas que deron coa clave para rascárlle un empate ao líder.
2DIV // J.07 // PABELLÓN OS REMEDIOS – 09/01 // OURENSE ENVIALIA FSF “B” · @valdetiresfsf (6·6)
¡Partidazo! De los que hacen afición. El líder no ha podido con nuestrxs chicas.
¡Imos ó lío!
Goles: Carla, Susana, (3) Zaide y Nerea Lorenzo #ourensEnvialia #ubuntu #imosOlio pic.twitter.com/cv2KnNtwbp
— Ourense Envialia FSF (@OUenvialiaFSF) January 9, 2021
Neste estreo do ano, a xogadora máis destacada nas filas locais foi Susana, autora da metade dos goles do seu equipo. Aínda que o empate tamén foi posible grazas aos tantos de Carla, Zaide e Nerea Lorenzo.
Triple representación de Marín esta tempada
Esta tempada presentou unha novidade no futsal galego. Tres equipos de Marín decidiron unir forzas o pasado mes de agosto e crear o actual ENCE Marín Futsal.
O Ancoradouro, o O Fisgón e a ED Marín chegaron a un acordo para fusionarse nun único club, tanto para a categoría feminina como a masculina. O obxectivo detrás desta decisión está en promocionar e potenciar o deporte marinense e converterse en referentes no futsal galego.
E parece que o arreglo está funcionando moi ben. Na Segunda División, o ENCE Marín cólgase a medalla de bronce, con catro vitorias e dúas derrotas.
Ademais, na Copa as futbolistas lograron vencer a un equipo de Primeira nos penaltis, o Viaxes Amarelle, e chegaron a enfrontarse ao vixente campión (tamén dono do título de Liga e Supercopa), o todopoderoso Pescados Rubén Burela. As Guerreiras Laranxas xa foron un rival demasiado forte e as xogadoras do Marín perderon cun 2-5 no marcador.
Para retomar a competición regular, as futbolistas visitarán ao CD Mosteiro Bembrive, no derbi entre os dous equipos da provincia de Pontevedra, o coñecido como ‘Duelo das Rías’.
O Bembrive despide e recibe o ano ante o mesmo rival
Ao ter sido cancelado o primeiro partido do 2021 do Bembrive ante as salamantinas, a súa estrea será coa volta do derbi pontevedrés.
No partido de ida, que pechou o 2020, disputado un día despois de Nadal, as viguesas non foron quen de dobregar ás de Marín, polo que sufriron unha derrota por 6-3. A recuperación da primeira xornada non tivo un resultado positivo para o Bembrive que, con sete puntos, son o equipo galego na peor posición, a penúltima.
As de Pitu levan un balance de tres derrotas, dúas vitorias (ante Envialia B e Fervenza) e un empate (contra o FSF Castro).
O FSF Castro disputa a súa segunda tempada en Segunda
Tendo en conta que a anterior tempada non se puido disputar con normalidade pola COVID-19, as futbolistas do FSF Castro son case unhas novatas na categoría. Este é o seu segundo ano disputando a competición de prata do futsal español.
O equipo lucense apostou por manter o grupo do ano pasado e só conta con tres incorporacións para este curso. Unha aposta que está dando resultados, xa que o Castro é xa o segundo clasificado. As futbolistas deste equipo só sufriron dúas derrotas e un empate no que vai de tempada 20/21.
Fin de semana de partidos
O futsal non para e para esta fin de semana todos os equipos volverán ao terreo de xogo. A oitava xornada comeza co encontro entre o Bembrive e o ENCE Marín, que xogarán o derbi na pista das viguesas o sábado, 16 de xaneiro, ás 16:30 horas.
Ese mesmo día, o filial do Ourense Envialia viaxará ata Salamanca para xogar contra o USAL, algo máis tarde, ás 20:00 horas.
O día seguinte será o turno do Fervenza contra outras salamantinas, do Inter Sala Salamanca, ás 12:00 horas en terras galegas. Catro horas despois, ás 16:00 horas, enfrontaranse o FSF Castro co Valdetires.
