Esta décimo terceira xornada de Primera División Femenina de voleibol trae dous partidos moi distintos para os dous equipos galegos que compiten. O Aceites Abril CVO buscará recuperar a senda da vitoria ante o colista, o D’Elhuyar, mentres que as galegas do Calasancias Coruña visitarán ao líder da categoría, o CV Oviedo.
Actualmente, nestes primeiros encontros da segunda volta, os tres equipos galegos da categoría mantéñense na zona media da táboa. O primeiro son as ourensás do Aceites Abril que, con 17 puntos, ocupan a quinta posición.
Un posto por debaixo, cun punto menos, está o CV Bruxas, que non puido disputar a xornada anterior e tampouco o fará nesta. Finalmente, na sétima posición están as coruñesas do Calasancias, con nove puntos.
Galegas contra o colista
O Aceites Abril recibe este domingo, 24 de xaneiro, ás 11:30 horas ao D’Elhuyar de Logroño. Un equipo que nos dez partidos que leva xogados só foi quen de sumar dous puntos.
As rioxanas teñen un balance de sete sets a favor, con 29 en contra, polo que a priori non serán un rival moi complicado para as galegas. Pola súa banda, o Aceites Abril está traballando en corrixir os erros que as levaron á derrota na visita a La Curtidora a xornada pasada.
Ademais, no cadro ourensán recordan que a posición do rival como farolillo da clasificación non debe ser motivo de confianza. Nesta tempada, cada encontro, sen importar o nivel dos equipos, está a ser moi disputado e igualado.
Un trunfo será vital para recuperar as boas sensacións e a confianza no xogo das galegas, que seguen loitando por chegar á parte alta da táboa. O duelo poderá seguirse nas redes sociais de Voley Ourense.
Galegas contra o líder
Non o terá tan doado o Calasancias Coruña. As herculinas visitan ao CV Oviedo, un equipo que non coñece a derrota e acumula actualmente 29 puntos.
Outro reto que deberán superar as galegas nesta xornada é a falta de rodaxe. Ao contrario que o seu contrincante, o Calasancias non puido disputar a xornada anterior, prevista contra as tamén galegas do CV Bruxas. Por iso, as coruñesas levan desde o 19 de decembro sen competir, cando foron derrotadas polo Fertiberia Los Campos.
Lograr sumar neste partido é vital para as da Coruña, que están a sete puntos do colista, pero tamén cunha diferenza de sete puntos respecto ao cadro que ocupa a posición superior.
Este encontro poderá seguirse no Facebook das asturianas.
Suspendida a cita do D’Elhuyar co Bruxas
Segundo informa o equipo rioxano, esta fin de semana tiñan unha dobre cita en Galicia: contra o Aceites Abril e o CV Bruxas. Finalmente, non poderán xogar contra as de Bertamiráns, xa que as santiaguesas teñen un caso positivo nas súas filas.
No mesmo post de Facebook, D’Elhuyar informa de que debido as restricións activas en A Rioxa por mor da COVID-19 nin as deportistas da base nin o seu primeiro equipo puideron acceder aos adestramentos.
