A Selección Galega de natación acadou o sexto posto na clasificación final do X Campionato de España por CCAA de categorías infantil e júnior con once galegas. O torneo celebrouse en Palma de Mallorca e nel participaron 16 seleccións autonómicas. A Selección vencedora foi Cataluña, seguida de Andalucía e Madrid.
Na categoría infantil, a Selección Galega foi sétima e en categoría júnior, tamén acadou a sétima posición. Galicia viaxaba a Palma de Mallorca cun total de 21 deportistas, seis delas de categoría feminina infantil e outras cinco de nivel júnior.
No torneo, a nadadora júnior Carla Carrón foi a máis destacada, non só do equipo galego, senón de entre as competidoras femininas, ao ser a deportista con mellor rendemento por puntos e a segunda do torneo, por detrás do andaluz Carlos Garach.
Carrón colgouse a prata nos 100 metros libre, cun tempo de 57.39, o ouro nos 800m libre cunha marca de 8:11.14. Tamén acadou outra primeira posición nos 400m libre, finalizando a proba en 4:17.20 e foi prata nos 200m libre, a só 0:00.01 da vencedora, María Victoria Yegres.
Sofía Carballo, pola súa parte, subiu ao podio dos 100m braza júnior na segunda posición, cun tempo de 1:12.39 e repetiu prata nos 200m braza cunha marca de 02:36.46.
O equipo do 4x200m júnior foi bronce, coas nadadoras galegas Carla Carrón, Julia Roríguez, Iria Lemos e Alicia Bouzas.
Na clasificación final de nadadoras, Carballo foi a segunda mellor entre as galegas, sumando 702 puntos, e Iria Lemos foi a terceira, chegando aos 687.
