- Alexandre Sanmartín ‘Jano’, coordinador xeral das ‘Gaélico Escolas PuntoGal’: “O crecemento foi exponencial”-
- Nesta tempada celebráronse ata oito torneos de base cuns 800 participantes.
Se algo caracterizou a última tempada 2023-24 no fútbol gaélico en Galicia foi o esforzo realizado para achegar esta modalidade á cativada. Na Asociación Galega de Fútbol Gaélico levaron este deporte a 21 centros educativos nos que 2.153 escolares recibiron unidades didácticas sobre este deporte.
Alexandre Sanmartín ‘Jano’, responsable das Seleccións Galegas de fútbol gaélico, e coordinador xeral das ‘Gaélico Escolas PuntoGal’, explicaba: “Estivemos impartindo unidades didácticas en ata 21 centros escolares. Sobre todo onde temos máis presenza é na provincia da Coruña e na provincia de Pontevedra. Pero hai que destacar que este ano introducimos por vez primeira unidades didácticas en centros de ensino da cidade de Lugo”.
Segundo defende Alexandre Sanmartín ‘Jano’, “mirando os datos este ano houbo un crecemento tanto de clubs tanto de clubs afiliados, como de número de eventos que se organizaron”.
Efectivamente as cifras apuntan a que se ten medrado en todos os ámbitos. Concretamente nas Gaélico Escolas PuntoGal, unha iniciativa orientada á cativada, teñen participado neste curso 2023-24 máis de 400 nenos e nenas.
Ata nove clubs se integraron nesta iniciativa que promove a Asociación Galega de Fútbol Gaélico co apoio de PuntoGal. O Estrela Vermelha foi o club que achegou máis deportistas a este proxecto pensado para crear canteira, pero as fichas repártense por diferentes puntos de Galicia dando conta dun crecemento desta disciplina por diferentes lugares como a Compostela, Vigo, Gondomar, A Coruña, Ourense, Boiro, A Guarda ou Poio.
As relación de fichas das Gaélico Escolas por clubs ordenadas segundo o número de participantes é a seguinte:
- Estrela Vermelha (Compostela): 89
- Turonia Gondomar FG (Gondomar): 65
- Keltoi Vigo (Vigo): 57
- Fillos de Breogán (A Coruña): 53
- Auriense (Ourense): 53
- Independiente (Vigo): 26
- Lorchos (Barbanza – Boiro): 21
- Grovias (A Guarda): 21
- Lume de Beltane (Poio): 21
Neste último curso sumáronse dous clubs novos, Grovias e Lorchos. Desde a Asociación Galega de Fútbol Gaélico anticipan que se está a traballar en que o vindeiro curso o número subira en dúas entidades máis que estarían en Boqueixón e Lugo. Significaría a recuperación da representación da provincia lucense na Asociación de Fútbol Gaélico (AGFG). No pasado houbo un club na Mariña que participou nalgúns torneos pero non chegou a debutar en competición oficial. Polo tanto, con esta incorporación a AGFG contaría con clubs nas catro provincias.
Uns 800 participantes en 8 torneos das Gaélico Escolas PuntoGal
Tal e como relata Alexandre Sanmartín ‘Jano’, coordinador xeral das ‘Gaélico Escolas PuntoGal’, neste curso 2023-24 desde a Asociación Galega de Fútbol Gaélico realizáronse “en total oito torneos de eses oito torneos, seis foron de carácter comarcal. Sobre todo destacamos o torneo que tivo máis afluencia de xogadores e xogadoras que foi o que se fixo no Valmiñor con 150, seguido dos torneos de Trazo e de Urdilde con máis dun cento de rapaces e rapazas”.
Nos oito torneos das Gaélico Escolas PuntoGal se chegou ao contar “ao redor de 800 participantes. Nesa cifra inclúense tamén os que viñeron de fóra”, puntualiza Alexandre Sanmartín.
Tal e como recorda o coordinador das ‘Gaélico Escolas PuntoGal’, este ano fíxose o “primeiro torneo galego que foi o PreFeile con cinco equipos. Eses cinco tamén participaron no torneo europeo, o Féile.
En concreto no Féile houbo representación das catro provincias galegas. Participaron Boqueixón (Boqueixón – A Coruña), Esquíos F.G. (Toén – Ourense), IES Xelmírez I (Compostela – A Coruña), Keltoi Montecastelo (Vigo – Pontevedra) e O Resío Turonia (Vigo / Gondomar – Pontevedra). Ademais Berlín, Vannes, Luxembourg, Basel e Bruselas foron as cidades europeas que tamén achegaron participantes a esta competición.
Alexandre Sanmartín: “O crecemento foi exponencial”
Realizando un balance do curso Alexandre Sanmartín ‘Jano’ apunta: “Valoramos altamente a tempada. Sobre todo polos datos que apuntan a un crecemento de número de torneos, un crecemento no número de xogadores, e un incremento das escolas deportivas”.
Detalla que nas “escolas deportivas pasamos de ter en Ourense 3-4, introducímonos na provincia de Lugo, e incorporamos A Coruña dentro das Gaélico Escolas PuntoGal. O crecemento é exponencial”, afirma ‘Jano’.
Campus no verán
“A idea é que teñamos un par de campus de verán”, di Alexandre Sanmartín. “E logo a previsión de crecemento de cara ao ano que vén é medrar sobre todo nas provincias nas que temos menos presencia que son Lugo e Ourense. E nas demais o obxectivo e manterse e ir medrando”.
“Queremos desenvolver torneos primeiro de carácter comarcal, logo provincial e finalmente a nivel galego”, explica.
A Asociación Galega de Fútbol Gaélico (AGFG) é o organismo regulador oficial do fútbol gaélico en Galicia, dende a súa aprobación oficial na convención Europea dos deportes gaélicos en decembro de 2013, o cal garántelle de carácter oficial internacional recoñecido polo máximo órgano, a Gaelic Athletic Asociation (GAA).
Boa parte das actividades da AGFG intégranse dentro da RFGF (Real Federación Galega de Fútbol).
PuntoGal é un dos patrocinadores da AGFG que ademais emprega na súa web o dominio www.gaelicogalego.gal.
