Logo de meses de negociacións e unha folga das traballadoras, o Convenio Colectivo do Fútbol Feminino español é, finalmente, unha realidade para as futbolistas. Ainhoa Tirapu, futbolista e vicepresidenta do Comité de Fútbol Femenino de AFE apuntaba que é un primeiro paso: “Aínda queda moito camiño, pero é certo que xa xeramos como para poder ter unhas condicións mínimas que son as que temos pedido esta vez”.
O Congreso dos Deputados acollía o acto de formalización e sinatura dun documento histórico o primeiro convenio colectivo do fútbol feminino español ratificado pola Asociación de Clubes de Fútbol Femenino (ACFF) e os sindicatos das futbolistas. Un fito histórico tamén no fútbol feminino europeo por ser o primeiro.
A presidenta do Congreso, Meritxell Batet presidiu o acto protocolario de sinatura dun convenio que garante dereitos laborais de diferente índole para as futbolistas profesionais en España.
Onte, segundo informaba o propio Congreso, a súa Mesa aprobaba de xeito unánime a petición formulada pola AFE (Asociación de Futbolistas Españoles) para que fose a cámara o recinto que acollese o acto de formalización dunha sinatura histórica para o balompé estatal.
No acto estiveron presentes representantes das fútbolistas e dos clubs, así como membros da Mesa do Congreso, e voceiros dos parlamentarios, ademais de representantes da Comisión de Cultura e Deporte e a presidenta do Consejo Superior de Deporte, Irene Lozano.
Logo da apertura do acto por parte da presidenta , Meritxell Batet, falaron o presidente da Asociación de Clubes de Fútbol Femenino (ACFF), Rubén Alcaine, o presidente da Asociación de Futbolistas Españoles (AFE), David Aganzo; e a vicepresidenta del Comité de Fútbol Femenino de AFE, Ainhoa Tirapu, xogadora di Athletic Club.
Ainhoa Tirapu lembra que este acordo para o Convenio debeu chegar antes
A cancerbeira do Athletic Club falou de unidade e de loita común. “Sinto fachenda da unidade que ten amosado o colectivo e estou orgullosa de formar parte del”, dixo para logo matizar que, pese a estar nun día de celebración, quería pór de manifesto que lle queda a “espiña da incapacidade de chegar a un acordo antes”.
Tirapu, futbolista e vicepresidenta del Comité de Fútbol Femenino de AFE: “Sinto fachenda da unidade que ten amosado o colectivo e estou orgullosa de formar parte del”
No seu discurso, Ainhoa Tirapu, lembrou que neste tempo sen acordo, houbo xogadoras “viron mermados os seus dereitos laborais por non levar a termo este convenio antes”. Falou, por exemplo, de posibles perdas de cotización neste tempo ou de xogadoras que se poden ter lesionado mentres non chegaba o acordo final.
Mirando cara ao futuro, Tirapu apuntaba que se puña “unha primeira pedra para poder seguir medrando nun proxecto próspero para o fútbol feminino”.
David Aganzo, AFE: “É un convenio histórico para o que foi preciso máis dun ano, moita negociación e pedagoxía”
Rubén Alcaine salientou os meses de traballo que deron como resultado este convenio do que “estar orgullosos. Foron moitísimos meses de traballo”.
David Aganzo falou de “convenio histórico para o que foi preciso máis dun ano, moita negociación e pedagoxía. Supón un cambio nas condicións laborais das nosas compañeiras”. Destacou que a primeira folga levada a cabo polas futbolistas “supuxo un punto de inflexión na negociación. Foi duro, e difícil, pero hoxe tedes o voso convenio”. Tamén fixo fincapé en que estamos diante do “primeiro convenio do fútbol feminino europeo”, polo é “pioneiro”.
Batet: “Un paso adiante en materia de igualdade efectiva entre mulleres e homes”
Pola súa parte, a presidenta do Congreso explicaba que o deporte “é un deses ámbitos onde a fenda entre homes e mulleres mantense en todas as súas expresións”. Falou en concreto do acceso, da retribución e o recoñecemento. Explicaba Batet que este Convenio Colectivo “é un recoñecemento nos dereitos laborais das futbolistas profesionais e con elo un paso adiante en materia de igualdade efectiva entre mulleres e homes”.
Meritxell Batet, presidenta do Congreso: “O deporte é un deses ámbitos onde a fenda entre homes e mulleres mantense en todas as súas expresións”
Na opinión da presidenta do Congreso, este Convenio Colectivo supón “avanzar nunha sociedade educada na igualdade”. Advertiu tamén, como no caso doutros participantes neste acto, que queda “moito por facer pero construirase sobre o alcanzado”. Apuntou que trátase de “deixar sempre un mellor escenario para as que veñen detrás”.
Meritxell Batet lembrou que este marco legal supón a expresión constitucional do “dereito a unhas condicións laborais dignas”.
O Convenio Colectivo asinado hoxe recolle dereitos para as futbolistas con respecto aspectos laborais como un salario mínimo, descansos ou maternidade, entre outros.
