- No caso dos Núcleos de Adestramento Deportivo Especializado (NADE), nesta ocasión foron concedidas as axudas de 30.000 euros a cinco NADEs: Club Kayak Tudense, Club BKC Kickboxing Coruña, Club Deportivo Natural Sport Videlgi, Club Halterofilia Coruña e Real Club Deportivo de La Coruña S.A.D.
O Diario Oficial de Galicia vén de publicar o pasado venres 21 de xullo a resolución de entidades beneficiarias, entidades desestimadas e entidades inadmitidas da concesión de subvencións a clubs deportivos, sociedades anónimas deportivas, seccións deportivas e núcleos de adestramento especializado de Galicia, para o desenvolvemento de actividades deportivas para o ano 2023.
A concesión destas subvencións conta cun importe máximo de 2 millóns de euros para dúas liñas de actuación. Por unha banda, o desenvolvemento de actividades deportivas, que terá un orzamento de 1,85 millóns de euros e, pola outra, os núcleos de adestramento deportivo especializado (NADE) desenvoltos a raíz do novo decreto de alto nivel do ano 2020 e que terá un orzamento de 150.000 euros.
En total, 1.527 entidades presentaron a solicitude para optar á liña de financiamento de actividades deportivas, acadando o número máis alto de solicitudes rexistradas. Destas, o 87% (1.317) resultaron beneficiarias, acadando tamén unha cifra récord de axudas concedidas.
Segundo informa a Xunta de Galicia “180 solicitudes foron denegadas por non acadar a puntuación mínima e outras 30 resultaron excluidas por non completar a documentación ou non cumprir requisitos. As entidades beneficiarias dispoñen dun mes de prazo para presentar a solicitude de aboamento da axuda concedida e demais documentación xustificativa”.
Na lista de entidades beneficiarias, que se pode consultar no DOG, figuran clubs de diferentes disciplinas como: esgrima, taekwondo, automobilisimo, fútbol, hoquei, karate, ximnasia, xadrez, rugby, fútbol sala, balonmán, motociclismo, orientación, fútbol gaélico, pádel, tenis, triatlón, actividades subacuáticas, ciclismo, boxeo, surf, squash, béisbol, tenis de mesa, patinaxe, remo, piragüismo, baloncesto, atletismo, montañismo, golf, natación, judo, petanca, loita, kickboxing, voleibol, etc.
Axudas da Xunta para os NADE
No caso dos Núcleos de Adestramento Deportivo Especializado (NADE), nesta ocasión foron concedidas as axudas de 30.000 euros a cinco NADEs: Club Kayak Tudense, Club BKC Kickboxing Coruña, Club Deportivo Natural Sport Videlgi, Club Halterofilia Coruña e Real Club Deportivo de La Coruña S.A.D.
Segundo informan desde a Xunta de Galicia, “o investimento público autonómico entre 2020 e 2023 en actividade e en equipamento deportivo supera os 61,9 millóns de euros, sendo os destinatarios das axudas os clubs e as federacións deportivas da Comunidade Autónoma. Neste 2023, a Secretaría Xeral para o Deporte conta cun orzamento inicial de 44.071.363 euros, un orzamento que se incrementa un 36% con respecto a 2022 (32.489.463 euros) e supón o maior orzamento da historia do deporte galego”.
