Esta fin de semana é o turno das atletas Sub-18 de demostrar o seu nivel no nacional de pista cuberta. En total, nove galegas competirán neste torneo, representando a seis clubs distintos.
Barcelona será o escenario entre o 13 e 14 de marzo desta competición, na que competirán algunhas das mellores atletas galegas. Na proba de velocidade destaca Ainhora Reparaz, do Val Miñor, que acude a loitar por un dos metais en xogo logo de amosar recentemente o excelente estado de forma polo que atravesa e que a levarían a batir os récords galegos tanto nos 60 m. con 7.75 como nos 200 m. con 25.18 nos pasados autonómicos Sub18 en Ourense.
Na carreira de 1500 m. estará Carolina Santos, do Ría Ferrol, e xunto a ela competirá Marcela Morgado, do S.A. Trega.
As atletas dos concursos
Xa nos concursos de atletismo, Carlota Salgado, do AF Celta, con 1.69 m. e Enma Sihuang, da Atlética Lucense, con 1.67 m. estarán novamente mantendo un intenso man a man pero desta vez a nivel nacional, xunto ao resto de atletas. A celeste ademáis, xa fora prata no nacional Sub16 do ano pasado.
O triplo salto será sen dúbidas a proba que máis atención depare para os intereses galegos xa que tanto a saltadora do Ría Ferrol Diaou Diallo con 12.65 m. como Alba Cuns, do Playas Castellón, con 12.55 m. ocupan as dúas primeiras posicións do ranking nacional. A final será unha nova oportunidade de ver en acción a estas dúas formidables atletas nun sector referente últimamente para o noso atletismo.
No círculo de peso contaremos ca lanzadora do Ría Ferrol Xiana Lago, quen representa unha importante baza para sumar metáis nesta competición. A pupila de Frank Casañas acude con 14.49 m. que representan con diferencia, a mellor marca nacional do ranking Sub18 do presente ano.
Continuando co papel de destacadas, Lucía Sánchez del Valle, da Atlética Lucense, tomará parte no concurso de pentathlon a onde acude ca mellor marca nacional das participantes con 3.768 puntos efectuado no pasado campionato de Galicia Sub-18 e que representan unha nova plusmarca autonómica da categoría.
