O atletismo galego segue de celebración despois da disputa do Campionato de España máster de Sabadell. Nesta proba, as atletas femininas da categoría colleitaron tres ouros, dúas pratas, un bronce e estableceron catro novos récords galegos e un español.
Esther Pedrosa proclamouse campioa estatal batendo o récord español, Ángeles Rodríguez foi subcampioa e Ana María Abuín e Nuria Pastor colgáronse o ouro con novos récords galegos, así como Cristina Estévez, que obtivo a prata, e Victorina Losada.
As máster galegas dominan os podios
Esther Pedrosa abriu o medalleiro, cun novo título nacional que engade ao seu extenso palmarés español e internacional. A atleta do Playas Castellón proclamouse campioa de España en Milla cun rexistro de 5:42.18 establecendo un novo récord de España.
Na mesma categoría e proba competiu María de los Ángeles Rodríguez, da Atlética A Silva, quedando subcampioa. Esta prata engadiuse ao bronce acadado no concurso de pentathlon de lanzamentos, con 2.476 puntos.
A proba de lanzamentos tamén tivo ouro con sabor galego, grazas a Ana María Aubín, compañeira de club de Rodríguez, que proclamouse campioa de España con 2.911, establecendo un novo récord galego.
No máster W55 dos 10.000m competiu Nuria Pastor, do Lugo Running, cun novo récord galego ao parar o reloxo nos 42:43.27, o que lle mereceu a medalla de ouro. Finalmente, as probas combinadas trouxeron outra medalla a Galicia, a prata de Cristina Estévez, do Atletismo Femenino Celta, con 4.617 puntos no W45, outro récord galego.
Tamén participou no Campionato de España máster a galega Victorina Losada, do Ourense Atletismo, na milla con 5:47.24, o que supón un novo récord de Galicia W35.
Nas categorías masculinas participaron Xulio Ventín, bronce nos M55 de lanzamentos, José Fernández, prata e récord galego en M60 de Milla, Rubén Diz, ouro nos 10.000m M40 e récord galego, José Benito Gómez, bronce na mesma distancia pero na M60, Carlos Ferrer, prata nas combinadas M60, Antonio Teijido, cuarto nos 10.000m, Javier Viteria, cuarto no pentathlon de lanzamentos, Marcelo Lanza, oitavo na Milla e José Ferreira, undécimo nos 10.000m.
Desta forma, o medalleiro máster da Federación Galega de Atletismo rematou cun total de once medallas, sete récords de Galicia e un récord de España.
