A axenda das competicións deportivas federadas cambiou por completo coa entrada en vigor das últimas medidas tomasdas pola Xunta en materia COVID-19. A suspensión deste tipo de probas impide que moitas atletas galegas poidan continuar coa tempada.
O mes de xaneiro prometía ser o reencontro entre deportistas e deporte no caso do atletismo galego pero, lonxe de ser así, supuxo unha volta aos adestramentos a distancia.
Tal e como recorda a Federación Galega de Atletismo, a última proba en terras galegas foi o pasado 16 de xaneiro, en Expourense, no marco do control de inverno de Pista Cuberta. Desde entón, as atletas non puideron voltar ás pistas en Galicia, truncando os seus plans de preparar as competicións nacionais.
As atletas marchan a outras comunidades
Esta situación fai que moitas atletas decidan acudir a outras comunidades da xeografía española para competir nas distintas probas e así acadar algunha marca mínima que lles permita participar nos Campionatos de España.
Un exemplo é a atleta Antía Chamosa, da Sociedad Gimnástica de Pontevedra quen, xunto co seu irmán Daniel, acudiu ao Campionat de Catalunya de Marxa para competir. Ao estar federados en Galicia, non puideron optar a medalla, pero ambos deportistas gañaron nas probas nas que competiron, sen facer boas marcas.
Neste mes de febreiro, explica a Federación Galega, celebraranse dúas citas moi importantes: o nacional sub23 en Valencia e o nacional absoluto en Madrid o 19 e 21 deste mes.
Ademais, tal e como apuntan desde o organismo, esta problemática deriva das distintas restricións sanitarias de cada comunidade. En Galicia, ao contrario de Valencia, Asturias, Andalucía e Madrid, non permite organizar estas probas federadas autonómicas.
Desta forma, só en xaneiro máis de sesenta deportistas das categorías feminina e masculina “peregrinaron” a outras cidades fóra de Galicia para optar a acadar as marcas mínimas. Esta cifra non inclúe as probas do Norte de Portugal, o destino competitivo preferido para as Delegacións de Pontevedra e Vigo.
En palabras da FGA, “todo parece indicar que namentras a situación sanitaria continúe impedindo a celebración de probas federadas en Galicia, o fluxo de atletas cara outras autonomías continuará con igual o maior ritmo, sendo proba delo os 37 inscritos esta fin de semana no control nacional de mínimas no Pazo dos Deportes de Oviedo”.