Quince días despois do último enfrontamento entre o CB Arxil e o GDKO Ibaizabal, galegas e vascas cítanse de novo. Desta vez o encontro será en terreo vasco, no marco da décimo oitava xornada da LF2, o sábado, 30 de xaneiro, ás 19:00 horas.
No primeiro duelo entre estes dous equipos esta tempada, o GDKO Ibaizabal foi quen saíu vitorioso. Cun resultado 55-65 as visitantes gañaron no CGTD de Pontevedra e as verdes non puideron facer nada por salvar o partido.
Ademais, esta cita saldouse coa lesión de María Lago, xusto ao comezo do partido, o que imposibilitou que xogase para o CB Arxil contra o Ibaizabal e na semana seguinte contra o Rosalía. Este último partido tivo mellor resultado para as xogadoras de Maite Méndez, xa que reencontraronse coa tan necesaria vitoria.
Nas últimas xornadas disputadas, tanto antes como despois do Nadal, o Arxil logrou vencer a todos os equipos que ten por debaixo na clasificación, é dicir, a moitos dos rivais directos que poden arrebatarlle a permanencia. Desde o club pontevedrés declaran que agora chega o turno de loitar contra as de arriba, ás que tamén queren vencer.
O Ibaizabal está a vivir unha tempada inestable
Nun prazo de só dous meses, o rival das pontevedresas do Arxil para esta fin de semana perdeu ao seu responsable técnico e a tres xogadoras importantes. Jose María Alcántara dimitiu a finais de novembro e Julen Berrocal collía a testemuña, un xoven adestrador procedente de Tabirako ST.
En decembro, a portuguesa Joana Alves foi a primeira baixa do plantel. Nese mesmo mes Peyton Ferris anunciaba a súa retirada do baloncesot. Semanas despois, o 4 de xaneiro, Laura Arroyo tamén deixaba o club vasco.
En compensación, o Ibaizabal recuperou a ficha na LF2 de Ainara Ramasco, a máxima asistente do cadro vasco na súa historia na FEB e tamén a de Nerea Vázquez.
Nova incorporación para compensar as baixas no Arxil
Entre a lesión de María Lago e a marcha de Bineta Ndoye, o conxunto verde está a perder efectivos. Por iso, a directiva do Arxil pechou esta semana a fichaxe de Samra Omerbasic, que chega desde a Liga Endesa para reforzar a posición de pívot.
