O CB Arxil ten pendente asegurar a permanencia e quere romper a mala traxectoria de xogo esta xornada. As verdes terán unha oportunidade importantísima para facelo, xa que xogan ante a ADBA, actual colista, o sábado 20, ás 19:00 horas.
Este será o penúltimo partido da Liga Feminina 2, antes de entrar na súa segunda fase. O Arxil ocupa actualmente a décima praza na LF2 pero quere optar á novena e iso pasa por vencer ás asturianas.
O equipo de Maite Méndez chega con malas sensacións, xa que acumula dúas derrotas consecutivas nas anteriores xornadas, sendo unha delas ante o Barakaldo e a outra ante o Magec Tías, outro rival en loita por non descender.
Nestes dous encontros a irregularidade foi a explicación tras as derrotas, xa que unha defensa intermitente e un ataque pouco efectivo impediron que as pontevedresas sumasen de dous en dous.
Para este encontro co ADBA, o obxectivo do Arxil pasa por volver a sentirse un equipo unido, e buscar as mellores ocasións nos ataques e non esquecerse da sáu característica defensa.
O rival do Arxil está colgando dun fío
Pola súa parte, a ADBA é o último conxunto clasificado, polo que neste momento, a falta de dúas xornadas, son o favorito para o descenso no Grupo A. Tamén son o equipo en peor momento competitivo, con seis partidos perdidos de maneira consecutiva.
A última destas foi ante o Ulla Oil Rosalía, polo que as compostelás foron capaces de colgarlle o farolillo vermello ás asturianas, librándose elas mesmas monmentaneamente do descenso.
O Rosalía aproveita a súa oportunidade para soñar coa permanencia (69-53)
As filas asturianas manteñen o bloque da tempada anterior, conformado principalmente por xogadoras da canteira. A senior Sara Fraile xoga acompañada polas recentemente ascendidas Carlota Velasco, Laura Martínez e Elena Guijo. Outra española destacada é Elisabet López, formada na NCAA e procedente da liga irlandesa.
No relativo ás estranxeiras, a fala portuguesa é a máis común nos vestiarios do rival do Arxil. Da tempada pasada permanecen Marcia Carvalho, Artemis Afonso e Marcy Gonçalves, todas en torno a unha media de 10 puntos por partido. Outra xogadora estranxeira é a estadounidense Devon Brookshire, con experiencia en NCAA, liga irlandesa e francesa. Todas elas compiten ás ordes do galego Sergio Cubeiro.
