As actuais restricións sanitarias por mor da Covid-19 están a limitar moito o aforo para os encontros deportivos. No caso do CB Arxil o encontro desta fin de semana diante do Adareva Tenerife so poderá ter nas bancadas a 30 seareiras. Diante desta dificultade o club sorteará, entre a súa masa social, as entradas para os dous encontros deste fin de semana do equipo da LF2, que xoga o sábado ás 19:30 horas, e do Arxil Mafari Café no CGTD.
Así, a directiva do equipo pontevedrés fará un sorteo entre as persoas abonadas ao equipo pontevedrés, cuxo resultado se comunicará por WhatsApp, redes sociais e email.
As aquelas persoas interesadas en acudir a estes partidos deberán comunicalo ata o venres, 20 de novembro, ás 16:00 horas. Poderán facelo a través dun correo ao cbarxil@hotmail.com ou cunha mensaxe ao Whatsapp ao número de teléfono móbil: 627 15 38 49.
Ollo ao peche perimetral que tamén limita o público do Arxil
Cabe recordar que debido ás limitacións de desprazamentos polos peches perimetrais, soamente os residentes nos concellos de Vilaboa, Ponte Caldelas, Barro, Cerdedo-Cotobade, Soutomaior, Campo Lameiro, Poio, Marín e Pontevedra poderán acudir a estas citas deportivas.
Para o resto de persoas interesadas en seguir o partido das pontevedresas na de Liga Feminina 2, este será retransmitido polo Canal FEB, e o partido de primeira nacional polo Youtube do Arxil TV.
