O último partido do 2020 para o CB Arxil presentábase como todo un reto: vencer ao segundo mellor equipo da Liga Feminina 2, o Osés Construcción Ardoi. Finalmente, o gran traballo do conxunto de Maite Méndez non foi suficiente para asinar unha vitoria e esta caeu do lado local, cun axustado 75-72.
Coa moral alta tras rematar coa racha de derrotas cunha vitoria ante a ADBA na xornada anterior, as pontevedresas chegaban a este encontro con enerxías e boas sensacións.
Case conseguen dar a sorpresa da fin de semana, sabendo plantarlle cara e dominar por momentos a un dos mellores equipos da LF2, no que foi o seu mellor partido nesta tempada.
O Arxil perdeu o partido nos minutos finais
No inicio do partido o ritmo estivo bastante estancado por parte de ambos conxuntos, destacando máis a falta de acerto local, ao errar varios ataques consecutivos. O conxunto de Méndez aproveitou así as ocasións que tiña para sumar tantos ao seu marcador, logrando situarse por diante.
O bo xogo do Arxil permitiu que as verdes roubasen varios balóns que se transformaron en puntos grazas ao acerto de María Lago, que remataría o encontro como máxima anotadora de entre galegas e navarras. Con todo, as locais reaccionaron e non lle permtiron ás de Pontevedra levarse o cuarto, logrando un empate 20-20 á fin do primeiro tempo.
Para o segundo, a igualdade no marcador seguiu reinando. O partido era un vaivén de tantos, sen un claro favorito, ata que, de novo, María Lago tomou as rendas e lograba con varios tiros adiantar ao Arxil no luminoso. Cunha diferenza de oito puntos a favor, o equipo galego perdeu forza e o Ardoi non desaproveitou a ocasión para achegarse no marcador. Desta forma chegou o descanso, cun 39-40 para as visitantes.
A pausa sentoulle ben ás locais, que saíron máis enchufadas ao campo de xogo e déronlle a volta ao resultado colocándose por diante. Maite Méndez buscaba a fórmula parar frear a unhas navarras que se reencontraron coas boas sensacións e o acerto e, tras un tempo morto, o Arxil mellorou nas loitas de balón e desde os tiros de tres.
Os últimos dez minutos chegaron case cun empate no electrónico, pero dando a vantaxe dun punto ao cadro local. As galegas seguían sendo superiores na pista, ante un Ardoi que loitaba por defender a súa segunda posición. Todo decidiuse a partir dun erro das visitantes, que aproveitaron as navarras para poñerse por diante, a falta dun minuto para o final.
A tensión no terreo de xogo non deixaba de aumentar a medida que pasaban os segundos e o partido non tiña un claro vencedor. Forster anotaba un dos dous tiros libres e pouco despois Arregi (MVP do duelo con 25 créditos de valoración) anotaba tres puntos para o Ardoi. A técnico das pontevedresas solicitou un tempo morto para loitar pola vitoria, pero os nervios traizoaron ás galegas, que perderon un balón vital.
As locais desfrutaron desta ocasión para esgotar os segundos finais cunha posesión en campo rival e, finalmente, o resultado final concluíu cunha derrota para as galegas, 75-72.
Á volta de Nadal, as xogadoras do Arxil teñen outro gran reto por diante, enfrontándose ás líderes indiscutibles da LF2, o BAXI Ferrol, o seis de xaneiro, ás 18:00 horas.
FICHA TÉCNICA
75) OSÉS CONSTRUCCIÓN ARDOI: Diana Cabrera (10), Amaya Gastaminza (11), Tamara Montero (9), Itziar Arregui (13) e Josephine de Barros (13) -cinco titular-. Tamén xogaron: Eva Cases (15), Alazne Vicente (-), Iranzu Echeverría (-) e Andrea Tollar (-).
72) CB ARXIL: Carla Fernández (4), Natalia López (5), María Lago (17), Moreira (4) e Forster (11) – cinco titular-. Tamén xogaron: Sara Castro (15), Bineta Ndoye (1), Cristina Díaz (8) e Noelia Masía (7).
PARCIAIS: 20-20, 19-20; 19-17 e 17-15
ÁRBITROS: Fernando Martínez e Javier Cortes.
INCIDENCIAS: Partido correspondente á décimo terceira xornada da LF2 disputado no polideportivo municipal Zizur Mayor (Navarra)
