Quince días despois, repítese a mesma historia. Desta vez o CB Arxil viaxaba á casa do GDKO Ibaizabal, para disputar o encontro da segunda volta, dúas semanas despois de celebrar a ida en Pontevedra. En ambos partidos, as galegas perderon de 10 puntos. Nesta segunda volta, o marcador foi 54-44.
Un resultado podería ter sido moito máis igualado, se non se atendera aos primeiros dez minutos de partido. A remontada non foi posible para as pontevedresas, que rematan a xornada na antepenúltima posición, con 22 puntos, a tres do colista. Pola contra, o Ibaizabal ocupa xa a sexta posición, con 28 puntos.
O mal inicio de partido castiga ao Arxil
As xogadas non saían e o balón non entraba no aro, nunha falta de efectividade en ataque comparable á defensa que imposibilitaba ás xogadoras do Arxil controlar o partido.
As locais dominaron como quixeron o primeiro tempo. O Ibaizabal non perdoaba baixo o taboleiro e, cun triple de Molina, desarmaba ás galegas. Cinco minutos fixeron falta para que as verdes, desta vez de gris, estrearan o seu marcador, con dous tiros libres convertidos por Forster. A metade do cuarto que restaba non foi tempo suficiente para que o Arxil se recompuxera e as vascas puxeron o 24-6 no electrónico.
Para o segundo parcial, as pontevedresas non daban o partido por perdido e saíron á pista con ganas de darlle a volta ao resultado. Lideradas por Sara Castro subiron o nivel da defensa e aumentaron a efectividade en ataque, reducindo distancias coas contrincantes.
Cunha lixeira vantaxe de dous puntos, o segundo cuarto foi para as visitantes, que seguían perdendo ao descanso por 35-19. Tras a pausa, o Arxil deu coa fórmula para frear o xogo local á vez que aumentaba a súa puntuación.
A oportunidade de remontar estaba a un tiro de pedra, pero os fallos desde o tiro libre impediron a xesta pontevedresa. O último tempo chegaba coas de Maite Méndez sete puntos por debaixo, con nada que perder e todo por gañar.
Os dez minutos finais deixaron ver a intensidade de ambos equipos sobre a pista. As galegas apretaban, pero nunca chegaron a igualar ás vascas. O Ibaizabal amarrou a vitoria, deixando os dous puntos en casa e facendo que o Arxil volvera a Pontevedra coas mans vacías.
Nas filas visitantes destacou Sara Castro, máxima anotadora do seu equipo con 11 puntos e MVP empatada coa rival Tulonen a 15 créditos valorativos.
Para a próxima xornada, o Arxil visitará ás galegas da AD Cortegada, nun encontro que se disputará en Vilagarcía o sábado, 6 de febreiro, ás 19:00 horas.
FICHA TÉCNICA
54) GDKO IBAIZABAL: Juana Molina (7), Ainara Ramasco (5), Kristiina Tulonen (15), María Koskimies (2) e Rebeca Cotano (10) -cinco inicial-. Tamén xogaron: Nerea Carrasco (-), Laura Marcos (7), Paule Portilla (-), Ane Arrien (-), Maiane Aizpurua (-) e Nerea Vázquez (6).
44) CB ARXIL: Carla Fernández (4), Cristina Díaz (3), Heather Forster (4), Natalia López (1) e Sara Castro (11) -cinco inicial-. Tamén xogaron: Noelia Masía (10), Violeta Crespo (-). Samra Omerbasic (9) e Margarita Moreira (2).
PARCIAIS: 24-6, 11-13, 6-15 e 13-10
ÁRBITROS: Aitor Gómez e Pablo Mirantes.
INCIDENCIAS: Partido correspondente á 18ª xornada da LF2 disputado no polideportivo Urreta de Galdakao (Vizcaia).
