O CB Arxil ten case asegurada a permanencia, pero aínda quedan tres xornadas por disputar. Para facela definitiva, un paso importante será vencer esta fin de semana ao MagecTías Contra la Violencia de Género. O partido será no Centro Galego de Tecnificación Deportiva CGTD de Pontevedra este sábado, 13 de marzo, ás 19:30 horas.
Con dous puntos máis que as canarias na clasificación e tamén dúas posicións por riba sitúase o CB Arxil. 30 puntos que fan soñar coa salvación na LF2, xa que suman dúas vitorias máis que as colistas.
Nas últimas semanas as pontevedresas, dirixidas por Maite Méndez, están a ter altibaixos na competición, xogando con máis acerto ante rivais complicados que ante os presumiblemente inferiores. Unha contradición sobre o papel pero unha realidade sobre a pista. Tal foi o caso, por exemplo, da visita dobre das xogadoras pontevedresas ás Illas Canarias, da que volveron cunha vitoria e unha derrota, unha de cal, outra de area.
Nesa viaxe, o Club Baloncesto Arxil recuperou o partido de ida co MagecTías Contra la Violencia de Género, caendo derrotadas por un 70-64, pero foron quen de vencer ao día seguinte ao Vega Lagunera Adareva Tenerife, entón sétimo clasificado, por un 68-70.
Xogando en casa esta fin de semana, as verdes queren redimirse da derrota colleitada hai un par de semanas e lograr así a súa terceira vitoria como conxunto local e, de camiño, acadar así tamén a súa permanencia matemática na Liga Feminina 2.
As claves para acadar este trunfo ben poderían pasan por defender con intensidade, non perder balóns e, sobre todo, non deixar ao MagecTías Contra la Violencia de Género xogar comodamente.
O rival do CB Arxil é forte
Agora Club Baloncesto Arxil e MagecTías Contra la Violencia de Género volven verse as caras e non será un encontro fácil para as galegas. As visitantes chegan nun gran momento de xogo. Unha circunstancia que acontece na parte máis importante do curso 2020 – 2021.
No caso das de Tías, nas últimas xornadas na Liga Feminina 2 conseguiron saír do posto de colistas a base de dúas vitorias consecutivas, unha derrota ante o Celta Zorka Recalvi, e unha terceira vitoria, a máis importante, ante as galegas do Ulla Oil Rosalía, polo que lle cederon o farolillo vermello ás deportistas compostelás.
Con estes resultados, o MagecTías Contra la Violencia de Género está metido de cheo na loita pola permanencia. Así, con 28 puntos no seu casilleiro, son antepenúltimas, pero empatan cos conxuntos da Agrupación Deportiva Avilés ADBA e do Ulla Oil Rosalía.
O reforzos mellora ao MagecTías
Ademais, as canarias reforzáronse para este tramo final con varias fichaxes que fan ao grupo mellor. E tal o caso de xogadoras como Camille Giardina, Maimouna Haidara ou Carla Escuert. Tamén mudaron ao director de orquestra xa que o MagecTías ten un novo adestrador á fronte do banco canario: Leocadio Pérez. A elas sumouse nesta semana a xogadora francesa Esther Rebecca Milandu, unha ala pívot de 22 anos.
Con estes cambios, pouco queda do MagecTías Contra la Violencia de Género que comezou a tempada. Porén, para esta xornada seguen lamentando a baixa de Yaiza García, pero recuperan a Sara Duarte, que volve ás pistas despois dunha baixa de longa duración.
Entre as súas filas destacan xogadoras como María Esperanza Delgado na base, así como a galega Regina Gómez e Carolina Mateo nas liñas exteriores.
Sorteo de entradas para acudir ao partido no CGTD
Este partido celebrarase de novo ante público, cun aforo de 60 persoas. O CB Arxil fará un sorteo das entradas entre as persoas interesadas.
Para participar, é necesario enviar un correo a cbarxil@hotmail.com ou mandar unha mensaxe ao 627 15 38 49. O límite é este venres 12, ás 16:00 horas.
O partido tamén poderá seguirse vía streaming a través do Canal FEB.
