O CB Arxil non superou o difícil reto ao que se enfrontaba a pasada fin de semana. En menos de 24 horas, as xogadoras de Pontevedra tiveron dous partidos da LF2 de baloncesto, e ambos saldáronse con derrotas. Despois de perder no último minuto ante o Celta o sábado, as verdes caeron ante o GDKO Ibaizabal o domingo cun 55-65 no marcador.
Galegas e vascas recuperaban o partido adiado da quinta xornada, aproveitando a viaxe das segundas a Galicia, para enfrontarse ao Ulla Oil Rosalía, ao que tamén venceron.
O Arxil acusou o cansancio acumulado
O sábado, no parqué de Navia viuse a un Arxil confiado e con gran acerto baixo o aro. Tanto, que case dan a sorpresa da xornada superando ao Celta Zorka Recalvi. Un verdadeiro pulso entre dous galegos que se decidiu nos instantes finais e case precisa un tempo extra para o desempate.
Todas as enerxías das pontevedresas quedaron en Vigo, porque ao día seguinte recibiron ao Ibaizabal, un rival de menor nivel que as celestes, pero a súa actuación non foi tan efectiva como contra as viguesas.
O partido xa comezou cruzado para as locais. A intensidade de dous encontros en menos dun día pasoulle factura a María Lago, que tivo que abandoar o parqué do CGTD no primeiro minuto con síntomas de dor. A xogadora verde, MVP do día anterior, saíu en brazos da súa compañeira Forster e a adestradora.
Malia esta baixa e que as visitantes levan un mellor balance de tempada, o primeiro cuarto estivo marcado pola igualdade no terreo de xogo. O acerto de Sara Castro mantiña a flote ao Arxil, situando ao seu equipo por momentos por diante. Aínda así, as vascas souberon aproveitar as debilidades das xogadoras de Maite Méndez e lograron unha lixeira vantaxe nos primeiros dez minutos.
A presión de xogadoras como Tulonen na liña exterior no bando rival facía case imposible que as verdes tomaran o control do partido. Un triple de Koskimies alonxaba máis ás vascas no marcador e o dúo Forster–Ndoye non era quen de compensar o xogo visitante.
Foi nos últimos minutos cando as xogadoras de Méndez deixaron uns destellos sobre a pista que as achegaban á vitoria. Un parcial 14-7 e un triple ao borde do descanso de Natalia López lograba que as verdes gañasen ao descanso pola mínima, cun 29-27.
O encontro decidiuse no final logo dunha segunda parte parella
Tras o descanso, o pulso entre ambos equipos seguía, alternándose no marcador. As vascas tiveron maior acerto desde a liña de tres, o que lles permitiu lograr distanciarse de seis puntos a dous minutos do final do terceiro cuarto. Pero as de Pontevedra non ían poñerlle as cousas fáciles ás visitantes, e pelexaron ata case empatar o resultado, chegando ao 44-45.
Así, de novo, un partido do Arxil decidiuse nos minutos finais. Un parcial 0-4 diminuía as opcións das verdes pola vitoria, pero un triple de Sara Castro as poñía de novo na loita. O Ibaizabal seguía sumando puntos coas galegas pisándolle os talóns.
O final estaba preto, e o rival cada vez máis lonxe. Malia os esforzos, as vascas seguían aumentando a distancia no marcador e o partido terminou por romperse cunha técnica a Maite Méndez. A falta de dous minutos, as galegas ían nove puntos por debaixo, no que finalizaría como unha derrota por dez puntos cun 55-65.
Con esta derrota, o Arxil perde a súa racha de vitorias en casa, e mantense na zona baixa da táboa, onde ocupa a undécima posición con 19 puntos tras catro vitorias e once derrotas.
Velaquí o resumo do partido, que retransmitiuse vía streaming no Canal FEB.
FICHA TÉCNICA
55) CB ARXIL: María Lago, Sara Castro (11), Natalia López (8), Forster (8) e Moreira (4) -cinco inicial-. Tamén xogaron: Carla Fernández (12), Crespo, Vázquez (-), Noelia Masiá (6), Díaz-Pache (4), Casalderrey (-) e Ndoye (2).
65) GDKO IBAIZABAL: Arrien, Cotano (12), Molina (14), Tulonen (11) e Koskimies (20) -cinco inicial-. Tamén xogaron: Laura Marcos (7), Portilla, Iruskieta (-) e Aizpurua (1).
PARCIAIS: 13-15, 16-12, 15-18 e 11-20.
ÁRBITROS: Abalo Buceta e Esteban Domínguez. Sen eliminadas.
INCIDENCIAS: Partido correspondente á 5ª xornada da LF2 disputado no pavillón do CGTD de Pontevedra ante 30 espectadores.
