A Federación Española de Baloncesto comunicou ao CB Arxil que o seu encontro correspondente á quinta xornada de Liga Feminina 2 con o Ibaizabal foi aprazado. O motivo é que o club vasco do Ibaizabal ten un positivo na plantilla e a sanidade vasca puxo en illamento a todo o equipo. Por ese motivo, a FEB decidiu suspender o partido.
Aínda que esta circunstancia trastoca os plans do CB Arxil, segundo explica Lino Vázquez: “é unha situación á que debemos adaptarnos e que vai estar á orde do día”.
Desde o club galego advirte que “non é o mesmo viaxar a Santiago”. Explican que será difícil “cadrar horarios para ir a Euskadi” para xogar co Ibaizabal este partido que queda pendente de disputa. A loxística do desprazamento “implica moitas horas de viaxe e algunhas xogadoras perden un día de traballo”, argumentan desde o CB Arxil.
Desde a entidade pontevedresa lembran que non son “un equipo profesional, como é o BAXI Ferrol. As nosas xogadoras estudan, traballan… Temos profesoras universidade, fisioterapeutas, administrativas, estudantes, profesoras de Primaria ou Infantil, polo que este adiamento vainos supór moitos problemas”, advirten ao respecto do partido que se adia contra o Ibaizabal.
O seguinte encontro do equipo de Pontevedra está previsto para o vindeiro sábado 7 de novembro ás 19:30 horas no CGTD. Será un partido no que se enfrontarán a outro club galego, a AD Cortegada.