O calendario 2023 do BTT galego botou andar este domingo coa II Resistencia Cidade de Narón, unha cita deportiva do ciclismo galego que fixo honra ao seu nome e que está incluída na Copa Galicia da modalidade.
A lama acumulada no circuíto de Pedroso puxo a proba a capacidade de sufrimento e de resistencia das 260 persoas participantes nesta xornada inaugural da Copa Galicia 3H Resistencia. A nómina de bikers que se vestiron coas primeiras camisolas de líderes encabezouna o máster-30 David Fernández, representante do conxunto anfitrión. A corredora Desiree Fernández marcou o ritmo máis forte de todas as ciclistas nas categorías femininas.
O Club Ciclista Narón preparou un percorrido circular de 8 quilómetros onde os ciclistas buscaban completar o maior número de voltas dentro do límite temporal das 3 horas. Non choveu, pero tampouco fixo falta para que resultara unha odisea superar algúns treitos pedaleando por mor do barro. A auga caída durante as últimas semanas multiplicou a esixencia dun desafío que por primeira vez formou parte do certame creado o ano pasado pola Federación Ciclismo Galego (FCG).
Na Copa Galicia 3H Resistencia pódese competir de xeito individual ou por parellas e esta cita disputárona, en total, corredoras e corredores de quince categorías. Á fronte da carreira viviuse un duelo entre o equipo local e o Xesteiras, gran dominador da Copa no 2022. O pulso entre estes dous bloques resolveuse co fenés David Fernández rematando a sétima e última volta cando o cronómetro marcaba 2 horas 54 minutos e 50 segundos.
O tamén máster-30 Manuel Ángel Parada, representante da formación de Cuntis, cruzou a liña de meta 38″ despois e o elite Xavier Meizoso fíxoo a 55″ do seu compañeiro de escuadra e primeiro clasificado. A cuarta praza, a 1’31”, correspondeu a Iván Pereira (Xesteiras), vencedor máster-40.
O quinto mellor rexistro asinárono os gañadores por parellas masculinas. O dúo Antonio Mato-Jesús Martínez (Toxo) conseguiron dar sete voltas en 2:59:42. Bateron a Samuel Varela-Fabián Rodríguez (Cambre) e a Daniel Rodríguez-Iván Fernández (Ourense Termal), segundos e terceiros respectivamente.
No resto de categorías de homes subiron ao máis alto do podio Danny Buba (Coruxo) nos juniors, Ignacio Casal (Extol) nos sub23, José Manuel Gómez (Xesteiras) nos máster-50, Manuel Dorrio (Cambre) nos máster-60 e a parella cadete Nicolás Fernández-Mauro Vega (Coruxo).
A vencedora feminina nesta proba de resistencia foi Desiree Fernández
Entre as mulleres a ciclista Desiree Fernández marcou o ritmo máis forte de todas as bikers nesta competición. A corredora do Ribadumia, triunfadora elite o ano pasado na xeral da Copa Galicia de Cross Country Maratón, foi a única que completou cinco voltas neste circuíto de Pedroso.
Por detrás dela, María José Veiga (Quercus-Aper) superou a Sofía da Silva (Extol) por 3’12” na batalla pola vitoria máster-30 despois de percorrer catro veces o circuíto. Mirian Iglesias (Media Ducia), cuarta na táboa absoluta, apuntouse o primeiro posto máster-40 e Sofía Ferreiro (Esmelle), o júnior. En canto ás parellas cadetes, Lara Pita e Xiana Coira (Cambre) colócanse como líderes da Copa.
Unha vitoria contundente acadaron Jana Buba e Martín Buba (Coruxo) na competición mixta con cinco voltas no seu marcador, unha máis que os segundos clasificados, María Rivera e Diego Roldán (Down Hill), e que os terceiros, Andrea Pousada e Marcos Serrano (Poio Bike).
O peche da xornada púxose coa entrega de premios que contou coa presenza de Marián Ferreiro, alcaldesa de Narón, e de José Oreona, concelleiro de Deportes, xunto a representantes da entidade organizadora e a Jacobo Ucha, técnico da FCG.
#CopaGaliciaRST23 | Resistencia en estado puro na apertura da Copa Galicia 3H en Narón
🚵♀️🚵♂️ O máster-30 David Fernández foi o máis forte nun enlamado circuíto. A elite Desiree Fernández e a parella Mato-Martínez, os outros grandes triunfadores
🔗 https://t.co/NgKP4YmKiV#NON pic.twitter.com/qjxOCgRGfv
— F_Galega de Ciclismo (@F_Gal_Ciclismo) January 16, 2023
O vindeiro domingo a Copa Galicia 3H Resistencia regresará coa 3 Horas BTT de Noia, segunda das cinco probas que compoñen o calendario.
