Arrinca unha nova tempada do fútbol gaélico en Galicia

•  Defenden o título da liga galega de fútbol gaélico as ourensás do Auriense Campus da Auga FG na feminina e os coruñeses Fillos de Breogán na masculina
• “Un terzo das licencias de fútbol gaélico en Galicia son femininas”, salientan desde a AGFG
• Ángel Negrete, presidente da Asociación Galega de Fútbol Gaélico: “É a 13.ª tempada do fútbol gaélico en Galicia, parece pouco pero fixemos de todo. Fomos a europeos, mundiais, temos Selección Galega, sumamos unhas 400 licencias sendo un terzo femininas”

Coa chegada do mes de outubro arrincan as competicións de liga da Asociación Galega de Fútbol Gaélico. Esta mesma fin de semana, en concreto o día 12 de outubro, dará comezo a competición masculina e o día 26 a feminina.

Ángel Negrete, presidente da Asociación Galega de Fútbol Gaélico, salienta neste arranque de competición: ”Esto supón a 13.ª tempada do fútbol gaélico en Galicia, parece pouco tempo pero o certo é que fixemos de todo. Fomos a Europeos, Mundiais, temos Selección Galega e o deporte está recoñecido oficialmente en Galicia”.

Ángel Negrete: “Un terzo das licencias de fútbol gaélico en Galicia son femininas”

Con respecto ao número de persoas que practican esta disciplina deportiva, explica Ángel Negrete “A nivel números xa hai un par de anos que recuperamos o número de licencias pre covid, o ano pasado xa o superamos, estamos en tendencia positiva e chegamos aproximadamente ás 400 licencias”. Pon en valor o presidente da Asociación Galega de Fútbol Gaélico o feito de que “un terzo desas licencias son femininas, non chega a ser paritario pero está por encima doutras disciplinas deportivas”.

O Auriense defende o título feminino

No caso da Liga Galega Feminina o arranque da competición está marcado para a fin de semana do 26 de outubro. Toma parte seis equipos:

1. Auriense Campus da Auga FG (Ourense)
2. Estrela Vermelha FG (Compostela)
3. Fillas de Breogán (A Coruña)
4. Grovias (A Guarda)
5. Lavandeiras de San Simón (Vigo)
6. Turonia Gondomar FG (Gondomar)

O sistema de competición é a dobre volta. Defende o título o Auriense Campus da Auga FG de Ourense que gañaban por vez primeira no curso 2024-25 a Liga Galega Feminina de fútbol gaélico.

Súmase á competición o conxunto vigués Lavandeiras de San Simón logo da baixa do Independiente.

 

Näytä tämä julkaisu Instagramissa

 

Henkilön Gaélico Galego (@gaelicogalego) jakama julkaisu

Hai representación das provincias da Coruña, Ourense e Pontevedra, con clubs nas localidades da Coruña, A Guarda, Compostela, Gondomar, Ourense e Vigo.

A primeira fin de semana de liga feminina ten estes partidos previstos:

26/10/24 (pendentes de horario e campos)

• Grovias vs Estrela Vermelha
• Auriense Campus da Auga FG vs Lavandeiras de San Simón
• Turonia Gondomar FG vs Fillas de Breogán

Tanto o calendario de competición como a clasificación está pendurada na web www.gaelicogalego.gal. O espazo adicado á liga feminina.

Fillos de Breogán defende o título masculino

A Liga Galega Masculina de fútbol gaélico conta con nove equipos participantes:

1. Auriense Campus da Auga FG (Ourense)
2. Estrela Gaels (Compostela) (filial Estrela Vermelha)
3. Estrela Vermelha FG (Compostela)
4. Fillos de Breogán (A Coruña)
5. Keltoi Estibadores (Vigo) (filial Keltoi)
6. Keltoi GAC (Vigo)
7. Lorchos (Barbanza)
8. Lume de Beltane (Poio)
9. Turonia Gondomar FG (Gondomar)

Defenden o título os coruñeses Fillos de Breogán que son os vixentes campións e que suman cinco campionatos de liga consecutivos. Tamén participan dous filiais, neste caso o Estrela Gaels, que depende do Estrela Vermelha de Compostela, e o Keltoi Estibadores que é canteira do Keltoi GAC vigués.

Hai representación de clubs de tres provincias galegas, só Lugo queda pendente de contar cun equipo nesta liga. Pontevedra e A Coruña son as que máis equipos achegan. Por localización xeográfica, hai representación de equipos da Coruña, o Barbanza, Gondomar, Compostela, Ourense, Poio e Vigo.

O sistema de competición na categoría masculina terá un arranque que consistirá unha volta de enfrontamentos de todos contra todos. Está pendente de decidirse nunha asemblea entre os clubs participantes como será o segundo chanzo da competición. Barállanse opcións como unha segunda volta completa, disputa de play-offs, etc.

A primeira fin de semana de liga masculina ten estes partidos previstos:

12/10/24

• 17:00 h Chaín (Gondomar) Turonia vs Fillos de Breogán
• 18:00 h Valiño (Boiro) Lorchos vs  Keltoi Estibadores

13/10/24

• 18:00 h Universidade (Ourense) Auriense vs Estrela Gaels

Tanto o calendario de competición como a clasificación está pendurada na web www.gaelicogalego.gal. O espazo adicado á liga masculina.

Outras competicións de gaélico como Europeo, Copa e Ibérica

Logo das competicións de liga, que rematarán contra do mes de abril, chegará o tempo para disputa de torneos de Copa ou o Ibérico dentro do fútbol Gaélico Galego.

Antes haberá citas como o Europeo de Clubs de Lyon que terá lugar na fin de semana do 19 de outubro e no que van participar Fillos de Breogán na categoría masculina e Fillas de Breogán e Estrela Vermelha na feminina.

Doutra parte, haberá competicións da Selección Galega que en novembro xa ten prevista unha cita, en marzo estará na Haia e no verán competirá no Europeo.

O presidente da Asociación Galega de Fútbol Gaélico, Ángel Negrete trasladaba tamén o agradecemento a “toda a xente que nos apoia para que isto saia adiante, patrocinadores, á Real Federación Galega de Fútbol que nos axuda coa loxística, e tamén a PuntoGal, levamos varios anos colaborando con eles e axúdanos sobre todo coas Gaélico Escolas que é un proxecto estandarte para poder chegar máis á rapazada, que esa rapazada poida subir aos seus primeiros equipos e que o fútbol gaélico galego poida seguir outros 13, 15 ou 40 anos máis”.

Ángel Negrete: “Grazas a toda a xente que nos apoia para que isto saia adiante, patrocinadores, á Real Federación Galega de Fútbol que nos axuda coa loxística, e tamén a PuntoGal, levamos varios anos colaborando con eles e axúdanos sobre todo coas Gaélico Escolas que é un proxecto estandarte para poder chegar máis á rapazada, que esa rapazada poida subir aos seus primeiros equipos e que o fútbol gaélico galego poida seguir outros 13, 15 ou 40 anos máis”.

A AGFG

A Asociación Galega de Fútbol Gaélico (AGFG) é o organismo regulador oficial do fútbol gaélico en Galicia, dende a súa aprobación oficial na convención Europea dos deportes gaélicos en decembro de 2013, o cal garántelle de carácter oficial internacional recoñecido polo máximo órgano, a Gaelic Athletic Asociation (GAA).

Boa parte das actividades da AGFG intégranse dentro da RFGF (Real Federación Galega de Fútbol).

PuntoGal é un dos patrocinadores da AGFG que ademais emprega na súa web o dominio www.gaelicogalego.gal.