Antes do remate do mes de marzo, comezou a Preferente Galicia Feminina de fútbol sala, unha categoría que reúne a 14 equipos de toda a xeografía galega e na que nesta tempada non haberá descensos. A competición desta sufriu varios retrasos debido á pandemia, pero na fin de semana do 27 e 28 de marzo o balón botou a rodar.
A Preferente divide aos seus participantes en dous subgrupos, A e B. No primeiro deles compiten o Concello de Begonte, Academia Red Blue 5 Coruña, Fisober, Fútbol Club Meigas, Ribeira FS Lieders, ADC Pescados Rubén Burela e Vilalba FS. No segundo, atópanse o Terra de Celanova FSF, Carballiño FS, ED Vigo 2015, Fútbol Sala Cidade de Pontevedra, Couto Ourense FS, Cidade de As Burgas B e Ganomagoga Balaídos FC.
O 4-0, o resultado de moda no subgrupo A
Cos emparellamentos para cada xornada xa organizados na preferente feminina, e a axenda completa ata xuño, a primeira xornada deu comezo o 28 de marzo con tres partidos. En todos eles, o equipo gañador o fixo por catro goles, fronte a 0 do rival.
Foi o caso do 5 Coruña, que debutaba ás ordes de Fani Martínez, ante o Concello de Begonte, endosándolle unha goleada a domicilio. As coruñesas foron superiores ás locais en todas as facetas do xogo, dominando o encontro desde o inicio e xerando moitas ocasións de gol. As autoras dos tantos foron Anita Lago (2), Alba Rodríguez e Ainhoa Iglesias.
Tamén o Fisober comezou da mellor maneira posible, cun 4-0 ás xogadoras do Meigas. O quinteto inicial foi clave para as locais neste encontro, xa que todas elas (agás a porteira), golearon, anotando dous tantos na primeira parte (Saray Duarte e Paula Fandiño) e dous na segunda (Adriana Castro e Uxía Lema).
Completou o triplo 4-0 o Ribeira Lieders, ante as Guerreiras Laranxas do Burela. As xogadoras locais só tardaron 5 minutos en abrir a lata do marcador e antes do descanso xa deixaron o partido ben encamiñado cun 3-0 (goles de Antía Pérez, Carla Hermida, Mariña Castro), rematado na segunda parte polo gol de Helena Puente.
Descansou nesta xornada o Vilalba, o favorito da competición.
Goleadas no subgrupo B
No subgrupo B os encontros tamén estiveron desigualados. No seu décimo aniversario, o Terra de Celanova sufriu unha derrota ante as xogadoras visitantes do Carballiño FS. Os dous primeiros goles chegaron cedo, nos minutos 6 e 8 con Blanca Rivera e Andrea Mosquera, e marcaron o ton do partido. A renda aumentou ata o 0-4 no minuto 23, con goles de Silvana Pena e Ana Rivera, mentres que as locais só puideron anotar o gol da honra no 32, grazas a Laura Balboa.
Co marcador invertido, un 4-1, gañou o Cidade de Pontevedra ao Couto Ourense, minguado polas lesións de Aldara e Antía. Porén, o encontro estivo igualado nos primeiros minutos, co 1-0 de Diana Otero seguido do 1-1 de Antía Sánchez. Pero as pontevedresas tomaron o control desde o minuto 34, co tanto de Tamara Pérez e dous máis de Otero, que completaría o hat trick.
O partido restante do grupo B enfrontou a Cidade de As Burgas B co Ganomagoga Balaídos, cun marcador 5-2. Este foi un partido de forzas desiguais, con xogadoras de nivel de Primeira División como Fara Antolín e Carlota Garayzabal no quinteto titular local. Precisamente esta última foi a autora do único gol da primeira metade no primeiro minuto de partido.
O segundo chegaría xa no minuto 30, con Lucía Vázquez. O marcador o aumentaría a súa compañeira María López tres minutos despois, pero desta vez as visitantes responderon cun tanto de Adriana López. As ourensás quixeron aumentar a súa renda e o fixeron con gol de Fara Antolín, mentres que as viguesas recortaban distancias co segundo tanto de López. Finalmente, un gol de Canolich Fernández no 38 sentenciaba o encontro.
Final del partido y 3 valiosos puntos ante un gran rival.
Buen trabajo del equipo donde las jugadoras son de edad juvenil y cadete. A seguir currando EQUIPO pic.twitter.com/5IBFPXwYtt— Cidade de As Burgas FS (@cidadeasburgas) March 28, 2021
Deste grupo de preferente descansou o ED Vigo 2015.
