Sen tempo para saborear un debut ligueiro exitoso (con triunfo ante o Rayo Vallecano 4-0) o Dépor ABANCA afronta o seu primeiro compromiso da Copa da Raíña deste curso. O rival é o CD Parquesol. O partido ten lugar hoxe mércores 14 de setembro ás 16:30 horas en Abegondo. A eliminatoria é a partido único.
Do debut en liga, a adestradora das deportivistas, Irene Ferreras, extrae “unha valoración moi positiva. O equipo atopouse en todo momento, impuxémonos en todas as fases do xogo, conseguimos desarbolar a un equipo moi xunto e que deixaba moi poucos espazos. Puidemos ser moi precisas no último terzo para xerar as suficientes chegadas que nos permitisen abrir a lata e que o partido fose máis aberto”.
Do debut do Dépor ABANCA en Liga Irene Ferreras fai: “unha valoración moi positiva. O equipo atopouse en todo momento, impuxémonos en todas as fases do xogo, conseguimos desarbolar a un equipo moi xunto e que deixaba moi poucos espazos. Puidemos ser moi precisas no último terzo para xerar as suficientes chegadas que nos permitisen abrir a lata e que o partido fose máis aberto”
A adestradora de As Nosas deportivistas confesa estar “moi satisfeita e moi contenta porque as xogadoras interpretaron á perfección o que requiría o partido e a contundencia do resultado dános moita moral”.
Queda Irene Ferreras destes primeiros 45 minutos con “o volume de ocasións e chegadas que xeramos. O resultado foi 4-0 pero puido ser máis avultado. Era algo que se pedía ao equipo, que se xerasen máis ocasións para ter a tranquilidade de non ter que ser tan precisas ou ter ese acerto na área”.
Ademais resalta “a ambición do equipo nese noventa e tantos minutos. En ningún momento o equipo relaxouse. A nivel defensivo todo o mundo responsabilizouse dos retornos que houbo que facer”.
Ao ser equipos da mesma división a temporada pasada, o choque será na Cidade Deportiva branquiazul posto que a bóla do Dépor ABANCA saíu en primeiro lugar no sorteo realizado na sede da RFEF o pasado 31 de agosto.
Irene Ferreras: “Afrontamos a Copa con moitas ganas e a autoestima reforzada”
A adestradora deportivista asegura que “afrontamos a Copa da Raíña con moitas ganas. Vir dun partido tan bo en casa e volver xogar en casa permítenos chegar coa autoestima reforzada, con moita confianza, con xente que sae de banco disposta a sumar e a ter máis minutos. O equipo ten a oportunidade de encamiñar dous partidos seguidos con boas sensacións. Ese vai ser o noso obxectivo: tentar gañar o partido por suposto pero darlle continuidade a esas sensacións e esa dinámica de xogo”.
Sara Navarro entra na convocatoria do Dépor ABANCA
Estréase nunha convocatoria Sara Navarro após a súa chegada a Abegondo xa fóra do mercado de fichaxes. Por contra, causan baixa por lesión Letti Sevilla, Carlota Sánchez e Lorena Reina. Pola súa banda, Noela e Paula Monteagudo, ambas xa con minutos en liga o pasado domingo, e Paula Novo son as representantes de #ANOSACANTEIRA na lista de 18 futbolistas.
Pola súa banda, o CD Parquesol, esta temporada no grupo norte de Segunda Federación, arrincou a liga o pasado sábado con derrota a domicilio por 2-0 ante a CE Europa.
O encontro desta tarde na Cidade Deportiva de Abegondo ten o seu parte emocional para Henar Muiña, Marta Charle e Lucía Alba, tres reforzos deportivistas con pasado no conxunto valisoletano.
Na pasada edición de Copa da Raíña, na temporada pasada, o Dépor ABANCA superou na primeira eliminatoria ao CF Pozuelo (1-9) e caeu en Abegondo ante o Granada CF (0-1) en segunda rolda.
Finalizado o choque ante o CD Parquesol, o cadro deportivista terá o xoves xornada de descanso.
