Galicia contará desde a vindeira tempada cun novo club de fútbol feminino. O CD Arenteiro do Carballiño anunciou hoxe, Día Internacional da Muller, a creación dunha sección feminina na súa entidade.
No comunicado publicado hoxe, o club asegura que o seu obxectivo é apostar polo fútbol feminino. Malia as consecuencias da pandemia, a entidade esta a recuperar xogadores a niveis prepandémicos e ten “un equipo completo en todas as súas seccións, a falta dunha: a feminina”.
O obxectivo: achegar o fútbol a mulleres de todas as idades
Con esta nova sección de fútbol feminino, o CD Arenteiro creará unha estrutura que se incorporará ao propio club para facilitar a práctica deste deporte a mulleres de todas as idades.
O proxecto comezará cos equipos base das diferentes categorías, e coa posibilidade de crear un sénior se hai o número necesario de xogadoras.
“Cremos que o fútbol feminino ten que ter un espazo importante neste club. Partimos de cero, pero será a nosa gran obsesión de cara a seguinte tempada”, anuncian no comunicado. As futbolistas interesadas en participar poderán contactar co club a través da súa web.
Para incentivar e animar ás xogadoras, representantes do club pasarán polos centros educativos da comarca para “animar ás rapazas a participar no fútbol e que nenas e nenos crezan en valores de igualdade a través do deporte“.
Como referente, o Arenteiro mira ao Fútbol Sala Carballiño, que xa conta con equipos femininos na súa estrutura. Estes novos conxuntos do club de fútbol competirán en liga galega nas súas categorías. De poder formar o equipo sénior, este plantel competiría na liga LGF, a segunda división.
Hoxe, 8 de marzo, queremos anunciar un proxecto que levamos moito tempo comezar a levar a cabo. E hoxe faise realidade. Incorporamos equipos femininos á nosa base e tamén un equipo sénior feminino.
Aquí está o comunicado:https://t.co/vluZViBLJe— CD Arenteiro (@CD_Arenteiro) March 8, 2022
Zulema González: “Esta oportunidade é unha pasada”
A árbitra de Primera Iberdrola Zulema González mostrou o seu apoio a esta nova iniciativa. A galega deixou a súa carreira como xogadora por falta de oportunidades, pero decidiu seguir vinculada ao fútbol a través da arbitraxe.
“Sempre é unha boa nova, sobre todo para aquelas que tivemos que escoller non poder seguir xogando. Esta oportunidade do Arenteiro para as cativas, e as non tan cativas, que na provincia de Ourense seguen a ter problemas para poder xogar ao fútbol é unha pasada”, destacou.
Ver esta publicación en Instagram
