Un torneo diferente dará o pistoletazo de saída á tempada do CV Arenal Emevé o vindeiro curso. A cita terá lugar no mes de setembro, nunha data aínda por definir e nela participarán as Loitadoras e os Loitadores, pero tamén patrocinadores, representantes institucionais, profesionais dos medios de comunicación e afeccionados.
Os clientes de Perfumerías Arenal que fagan compras durante os meses de xullo e agosto nas tendas da provincia de Lugo poderán entrar nun sorteo para compartir equipo coas figuras máis destacadas dos equipos de Superliga.
“A xeración de sinerxias entre todas as persoas, empresas e institucións que nos dan o seu apoio ten unha gran importancia”, destacou a presidenta do CV Arenal Emevé, Bibí Bouza
“É unha gran oportunidade para que todos os que apoiamos o labor do club estreitemos lazos dunha forma orixinal e diferente”, recoñeceu o CEO de Perfumerías Arenal, Rafael Marzán.
“Compartimos moitos valores, pero sobre todo unha visión disruptiva de como achegar valor aos patrocinadores e a todos aqueles axentes sociais que lles apoian”, sinalou o director de Atalaya Comunicación, Pablo
Vázquez
O novo curso para o CV Arenal Emevé arrincará dunha forma diferente: os Loitadores e Loitadoras compartirán cancha con patrocinadores, representantes institucionais, profesionais dos medios de comunicación e afeccionados nun torneo ProAm impulsado por Atalaya Comunicación.
Esta mañá presentouse na sede de Perfumerías Arenal, patrocinador principal do CV Arenal Emevé, a I edición do torneo ProAm Atalaya Comunicación – Arenal Emevé nun acto que contou coa presenza do CEO da firma lucense, Rafael Marzán; a presidenta do Arenal Emevé, Bibí Bouza; e o director de Atalaya Comunicación, Pablo Vázquez.
A cita, con data aínda por definir, disputarase no mes de setembro no Pavillón Municipal de Lugo, sede habitual dos partidos dos equipos de Liga Iberdrola, Superliga Masculina e Primeira Nacional. Nela participarán catro conxuntos nos que se mesturarán xogadores e xogadoras do primeiro equipo con patrocinadores, personalidades destacadas da sociedade lucense, xornalistas e afeccionados.
Este tipo de evento é unha práctica de márketing deportivo moi habitual en Estados Unidos e ten como obxectivo fortalecer a relación entre os clubs, os seus patrocinadores, os axentes sociais e a súa masa de seguidores.
“Durante dous anos compartimos traxecto co CV Arenal Emevé e iso fainos sentir que somos parte desa familia. Compartimos moitos valores co seu equipo de xestión, pero sobre todo unha visión disruptiva de como achegar valor aos patrocinadores e a todas as institucións que lles apoian”, sinalou o director de Atalaya Comunicación, Pablo Vázquez.
“Por iso decidimos propoñerlles a organización deste torneo. Seguro que será o primeiro de moitos e afianzará aínda máis a relación de toda a comunidade en torno ao CV Arenal Emevé. É un pracer formar parte dela e compartir hoxe esta presentación cunha empresa como Arenal e un club como o Emevé que son referentes en Lugo e en España”, concluíu.
Os afeccionados poderán participar grazas a Arenal
Aquelas persoas apaixonadas do vóley que queiran participar na competición poderán facelo grazas a Perfumerías Arenal. Quen realice compras nas tendas da provincia de Lugo durante os meses de xullo e agosto entrarán nun sorteo para compartir equipo coas figuras máis destacadas dos Loitadores e as Loitadoras.
O CEO de Perfumerías Arenal, Rafael Marzán, recoñeceu que “para nós é moi estimulante apoiar a un club que forma a máis de 500 nenos e nenas nas súas categorías inferiores, ademais de levar o nome de Lugo polos pavillóns máis importantes de España”.
Sobre a iniciativa destacou que “é unha gran oportunidade para que todos os que apoiamos o labor do club estreitemos lazos dunha forma orixinal e diferente”.
Bouza, presidenta do Arenal Emevé, salienta as “sinerxias” que se crean
Pola súa banda Bibí Bouza subliñou “a importancia que ten a xeración de sinerxias entre todas as persoas, empresas e institucións que nos dan o seu apoio”.
Segundo explican desde o club lucense, “a celebración da I edición do torneo ProAm Atalaya Comunicación – Arenal Emevé súmase aos primeiros pasos por parte da dirección do club para constituír un club de empresas que axilice e faga máis fluída a relación entre os patrocinadores e institucións que lle apoian cos seus públicos e prescritores”.
