O combinado da Selección Española comeza a preparar a competición de Toquio 2021 e para iso conta con dúas representantes do deporte galego: Alicia Fernández e Paula Arcos, xogadora do Atlético Guardés. Coa Liga Guerreras Iberdrola xa finalizada, o balonmán español pode centrarse plenamente nos próximos Xogos Olímpicos.
O seleccionador Carlos Viver deu a coñecer a lista das 22 xogadoras convocadas para a primeira e segunda fase de preparación dos Xogos, incluíndo á galega, que compite para o SCM Ramnicu Valcea, e á xove competidora do equipo do Baixo Miño.
Todas as Guerreras concentraranse do 12 ao 20 de xuño primeiro e do 27 de xuño ao 4 de xullo despois, en Pas de la Casa (Andorra) para adestrarse tras unha tempada marcada pola pandemia.
Paula Arcos, a sorpresa da convocatoria
A gran tempada do Atlético Guardés, subcampión de liga, non tería sido posible sen xogadoras como Paula Arcos. A alicantina de 19 anos viu recompensado o seu esforzo cunha primeira convocatoria coa Selección o pasado mes de abril, debutando con tres tantos ante Dinamarca.
Neste mesmo encontro a galega Alicia Fernández foi a máxima goleadora.
Protagonismo galego nas Guerreras co debut de Paula Arcos e Alicia Fernández como máxima goleadora
Desde entón, o seu xogo deu motivos de sobra a Carlos Viver para formar parte do grupo nestas dúas fases de preparación, sendo a principal novidade na lista das Guerreras.
A lista completa de xogadoras
Nas próximas semanas, ata 22 xogadoras vestirán a camiseta da Selección Española:
- Portería | Silvia Navarro (Rocasa Gran Canaria), Darly Zoqbi (CS Gloria Bistrita), Mercedes Castellanos (Rincón Fertilidad Málaga)
- Central | Silvia Arderius (Rincón Fertilidad Málaga), Alicia Fernández (SCM Ramnicu Valcea), Nerea Pena (Team Esbjerg), Carmen Campos (JA Dijon)
- Lateral Dereito | Irene Espínola (Neckarsulmer), Almudena Rodríguez (CS Gloria Bistrita), Mireya González (SCM Ramnicu Valcea)
- Lateral Esquerdo | Alexandrina Cabral (CSM Bucuresti), Ivet Musons (Elche Visitelche.com), Paula Arcos (Atlético Guardés), Lara González (ED Besançon)
- Extremo Dereito | Marta López (SCM Ramnicu Valcea), Carmen Martín (CSM Bucusresti)
- Extremo Esquerdo | Jennifer Gutiérrez (Borussia Dortmund), Soledad López (Rincón Fertilidad Málaga)
- Pivote | Eli Cesáreo (Super Amara Bera Bera), Ainhoa Hernández (Zubileta Evolution Zuazo), Lysa Tchaptchet (Elche visitelche.com), Kaba Gassama (Nantes Loire AH)
As xogadoras están citadas para o 12 de xuño no aeroporto Josep Tarradellas Barcelona-El Prat, desde onde partirán ás 15:00 horas en autobús destino Pas de la Casa.
As españolas estarán concentradas e adestrando ata o domingo 20 de xuoñ, cando regresen tras a sesión de traballo matinal. As mesmas xogadoras repiten concentración unha semana despois, seguindo a mesma dinámica.
