O Comité Técnico Galego de Árbitros de Fútbol (CTGAF) organizou o sábado 26 de agosto, en Santiago de Compostela, as xornadas arbitrais de inicio de tempada para árbitros de Terceira Federación (29) e Preferente Galicia (60), árbitros asistentes de Segunda Federación (8) e Autonómicos (19) e tamén para asesores arbitrais. Nesas probas estiveron as colexiadas de Terceira Federación, Preferente e as asistentes de Segunda Federación e Autonómica.
Pola mañá as/os árbitras/os e colexiadas/os asistentes realizaron as probas físicas no campo municipal do Sergas. En primeiro lugar, as/os árbitras/os pasaron as probas de velocidade con 6 series de 40 metros en menos de 6 segundos e posteriormente a de resistencia chamada SDS, con 3 bloques de 5 repeticións de 60 metros.
Pola súa banda, as/os árbitras/os asistentes superaron a proba de velocidade, 5 series de 30 metros en menos de 4,7 segundos, a de resistencia chamada ARIET e o CODA en menos de 9,8 segundos. Ao finalizar os controis físicos, realizaron os controis técnicos no salón Amancio Amaro na sede federativa.
As/os asesores arbitrais, pola súa parte, comezaron a xornada coa realización dos exames de regras de xogo e análise de vídeo. A continuación recibiron as normas e consideracións do informe arbitral e as directrices para esta nova tempada 2023/2024 de parte do vogal de información Roberto González Martínez, o membro da Comisión Técnica Rubén Eiriz Mata e o presidente Bernardino González Vázquez.
A actividade reanudouse pola tarde con sendas charlas técnicas, a primeira impartida polo director técnico Julio Amoedo Chas e a segunda polo membro da Comisión Técnica Rubén Eiriz Mata. O presidente Bernardino González Vázquez pechou a xornada expoñendo as directrices do CTGAF para esta nova tempada 2023/2024 aos árbitros e árbitras presentes.
