A colexiada Florinda Medrea arbitraba onte, sábado 11 de marzo, un partido de baloncesto en Ourense cando tivo constancia dunha urxencia sanitaria no exterior do pavillón. Médica de profesión, ademais de árbitra de basket, Medrea parou o partido e saíu auxiliar “sen pensalo”, tal e como confesou posteriormente.
Di Florinda Medrea que a súa reacción saíulle “de dentro, é algo totalmente normal” dentro do traballo dun profesional sanitario. Nesta situación, a árbitra e médica galega concentrouse en “manter a orde e a estabilidade e asegurar que os protocolos se cumprisen axeitadamente”, así como “aportar seguridade e tranquilidade”.
“É o instinto natural do sanitario”, di Florinda Medrea
A colexiada do Comité Galego de Árbitros da Federación Galega de Baloncesto “non dubidou en deter o partido no que tomaba parte para dar resposta a unha chamada de auxilio sanitario que proviña do exterior do pavillón”, explican desde a Federación Galega de Baloncesto (FEGABA).
Florina Medrea explica que reaccións como a súa, particulares polo marco no que ás veces suceden, corresponden ao “instinto natural do sanitario: o de protexer á xente”, e é así “como se desfruta totalmente da profesión”.
Relatan desde a Federación Galega de Baloncesto que a súa “profesionalidade, unha vez puido regresar á pista coa situación afortunadamente controlada, tornou de novo cara á arbitraxe e o deporte, protagonistas aquí totalmente secundarios. O partido volveu á normalidade, pero amosando que o baloncesto son as persoas que o compoñen e os seus valores, tanto dentro como fóra da pista”, resaltan desde a FEGABA.
🏀🧡 Deporte, arbitraxe e valores!
🙋🏻♀️A nosa compañeira colexiada CGAB, Flor Medrea, dirixiu este sábado en Ourense un partido especial!
👉Médico de profesión, non dubidou en deter inmediatamente o encontro no para dar respostaa unha chamada de auxilio que proviña da rúa! 🧵👇 pic.twitter.com/EcnmOWP52v
— FGB (@FGB_Baloncesto) March 12, 2023
Non é de estrañar que Florina Medrea recoñeza sentirse “moi orgullosa” do que está a facer, e do que lle resta por diante para a súa carreira. “Encántame a miña profesión e tamén arbitrar, creo que non son para nada incompatibles”.
Desde a Federación Galega de Baloncesto trasladan os seus “parabéns a Florina Medrea por desempeñar con ilusión dúas paixóns tan distintas: a arbitraxe e a medicina. E agradece aos equipos EDO Blanco Amor e CB Val de Lemos, e a todas as persoas presentes no Pavillón pola súa comprensión”.
