A Concellería de Deportes do Concello da Coruña apraza a media maratón Coruña21, que estaba programada para o 14 de febreiro, debido ás circunstancias sanitarias actuais derivadas da pandemia de COVID-19.
Desde a concellería coruñesa recordan que a cita non só esperta interese entre as/os atletas federados/os, senón tamén entre as persoas afeccionadas a correr esta distancia. A Xunta de Galicia ven de decretar esta mesma semana a suspensión das competicións en deporte federado de ámbito autonómico como medida de prevención e freo ao contaxio do coronavirus entre a poboación da nosa comunidade.
Foi precisamente pensando nas persoas non federadas que se sumaban a esta carreira que desde o consistorio herculino estiveron valorando até o último momento ofrecerlles a todas e todos as/os atletas unha alternativa axeitada ao momento actual da pandemia. Pero, finalmente, as limitacións ao respecto das media maratóns sobre o número de participantes e a ampliación de espazos na saída e na meta, entre outras cuestións, imposibilitan calquera opción que combine un alto nivel competitivo coa partipación na mesma proba de corredores/as populares.
A concelleira de Deportes, Mónica Martínez, afirma que “á vista do crecemento dos contaxios e tendo en conta a implantación das novas restricións ditadas pola Xunta de Galicia e que afectan directamente ao deporte popular e federado, Deportes anunciará a data definitiva da XIII edición da Media Maratón C21, incluída no calendario oficial da Real Federación Española de Atletismo, cando a situación sexa favorable”.
Dado que o primeiro obxectivo é protexer a saúde pública, Deportes vese na obriga de pospoñer a carreira até que a situación epidemiolóxica o permita con todas as garantías de seguridade.
Mónica Martínez, concelleira de Deportes do Concello da Coruña: “Anunciaremos a data definitiva da XIII edición da Media Maratón C21, incluída no calendario oficial da Real Federación Española de Atletismo, cando a situación sexa favorable”
Desde o Concello da Coruña aseguran que se teñen en conta todas as recomendacións para a realización de actividades deportivas e se adoptan outras adicionais co fin de que a veciñanza estea protexida ao máximo.
A Coruña acolle catro das seis probas atléticas que a RFEA celebrará en Galicia
