Na previa do partido co Tenerife o técnico do Durán Maquinaria Ensino, Antonio Pernas, falaba ante os medios de comunicación en rolda de prensa deste choque e de como chega ou conxunto lucense a este choque. Antonio Pernas confía no seu equipo pero agarda aínda máis vendo como adestran. Enfronte terán a un equipo que non gañou aínda na casa, xusto ao contrario do Ensino que aínda non puntou fóra.
Consultado sobre como ve o xogo do equipo lucense, o técnico era franco e recoñecía que “se por xogo fóra, a última semana a verdade é que non xogamos nada ben. As cousas como son. Sacamos adiante un partido moi complicado pero non foi por facer ben as cousas en ataque”, admitía Antonio Pernas.
“Espero que sexa o último que xoguemos tan mal”, dicía Antonio Pernas en referencia ao último choque
Con todo o preparador das galegas é optimista. “Espero que sexa o último día que xoguemos tan mal. Véxoas adestrando bastante ben. Estamos nunha boa dinámica. Pero estamos todos empezando. Somos equipos que estamos a consolidar as nosas pezas. Iso pode dar lugar a esas regularidades, que igual unha semana si que estás algo máis acertado (tamén o tema do acerto é algo que non preocupa excesivamente), pero a capacidade de saber interpretar onde está o partido ás veces, ou onde está a vitoria, pois é o que igual nos fixo gañar o outro día. Aplicámonos moito máis en defensa, aplicámonos moito máis noutras cousas, que tamén a imos traballando día a día, pero igual non se ve tanto”.
Tal e como declaraba Antonio Pernas, o adestrador considera que o bloque do Durán Maquinaria Ensino “está nun punto de preparación como todos os equipos na oitava semana da liga ou da tempada. De feito hai moitas sorpresas a modo de vitorias a domicilio de equipos cos que a priori non se conta… Empézanse as competicións europeas co que haberá equipos que teñan varias semanas dous partidos. Nós creo que estamos nun punto de construción e involucrando a todas as xogadoras”.
O Durán Maquinaria Ensino busca o primeiro triunfo fóra da casa
Consultado sobre se o feito de que outros equipos empecen as competicións europeas pode virlle ben ao Ensino, o técnico Antonio Pernas declaraba: “Seguramente. En tema físico todo o que sexa agora mesmo adestrar e preparar equipo para o partido da semana é moi bo. Quizais non teñamos ese ritmo de competición que che dá unha competición europea pero creo que temos bastante co que temos e a liga nacional e moi contentas e concentradas nos partidos domésticos”.
O Durán Maquinaria Ensino afronta nesta quinta xornada o seu terceiro partido lonxe do Pazo e aspira a asinar o primeiro triunfo lonxe da casa. Preguntado por ese tema, o adestrador admitía que, obviamente, é o obxectivo buscado. “Oxalá. Os partidos de fóra valen dobre e máis contra un rival que de momento non se estreou en casa. Eu creo que terá as mesmas urxencias que nós mesmo máis de poder xogar en casa ben e gañar. Espero un partido moi disputado. Sen desmerecer. Son un bloque de xogadoras de moita calidade, xa non che falo do tema en termos económicos, teñen moita calidade individual. Aínda non están nese punto que o seu adestrador quere pero seguramente que o conseguirán”.
O Tenerife (CDB Clarinos Ciudad de La Laguna), non gañou na casa, e contabiliza os seus dous últimos choques como derrota, ademais de ocupar a penúltima posición na táboa, pero certamente é algo inesperado. Perderon partidos por marcadores moi igualados. É a súa situación semella que é enganosa.
O propio Antonio Pernas era desa opinión. “Estamos a falar destes primeiros meses de competición, os equipos están aínda sen consolidar. Imos tentar aproveitar un pouco iso. Este equipo, o Clarinos, está chamado a moito máis arriba do que agora mesmo está. Perdeu dous partidos en casa con Leganés e Estudantes, e con todo, é capaz de gañar a domicilio a IDK que á semana seguinte gana a Salamanca. Ese é un pouco a tolemia de como está a competición. Esperamos un partido moi duro, xa che digo, porque o bloque do Tenerife está feito para outros mesteres”, argumentaba.
Ao respecto do do cansanzo que podería levar aparellado o desprazamento a terras Canarias, o adestrador das galegas quitáballe importancia. “Traballamos para tentar chegar ben ao partido e competir. Todo o mundo ten que ir a Tenerife e elas teñen que vir. Estamos listas para competir”.
Todas as xogadoras disponibles a expensas de Blanca Millán
Antonio Pernas explicaba que agarda non ter baixas aínda que advertía dun contratempo “de última hora, xa que Blanca Millán está aínda en observación despois dun choque cunha compañeira. O típico choque de adestramento, pero que foi nunha zona un pouco máis complicada. Produciulle algún mareo, malestar, polo que imos ser cautos, haberá que saber como está en lasas próximas horas pero esperemos contar con todas as xogadoras para o partido”.
