Nesta sétima xornada de Liga Femenina Endesa o Durán Maquinaria Ensino viaxa a Lleida a medir forzas co Cadí La Seu ao Municipal D´Esports de Seu D´Urgell. O partido está fixado para as 19:30 horas do sábado 12. As catalás son duodécimas mentres que as galegas son décimas cun partido máis gañado. Así e todo, o técnico, Antonio Pernas, é precavido. Lembra que a clasificación está nun pano, aspira a gañar pero avisa de que será complicado.
“Foi unha boa semana de adestramentos. As xogadoras están contentas e traballando. Habemos tentando mellorar cuestións de toma de decisións. Temos marxe de mellora aí co traballo diario. Están todas dispoñibles. Hai algunhas coa típica sobrecarga, pero esperamos contar con todas”, explicaba na rolda de prensa previa ao partido o técnico das galegas.
A toma de decisións é un dos elementos do xogo a mellorar no Durán Maquinaria Ensino segundo o seu adestrador, Antonio Pernas: “O último partido en casa, ademais das porcentaxes de tiros, en certos momentos faltou mellorar a toma de decisións. Levar o balón a determinado sitio onde poderiamos tomar máis vantaxe. Hai partidos nos que ten menos importancia pero noutros partidos igualados pode facer que non cheguemos ao máximo. Cunha mellora na toma de decisións creo que poderiamos achegarnos máis. Á fin e ao cabo estamos a afinar. É unha mellora importante nas xogadoras”.
O Cadí La Seu é “un equipo para estar máis arriba do que está”, di Antonio Pernas
Ao respecto do rival desta fin de semana, o Cadí La Seu, Antonio Pernas é precavido e avisa: “Xa colleu a velocidade de cruceiro. Véxoas soltas, cohesionadas, teñen un equilibrio no xogo interior e exterior. Xogan cun 3 grande. O rebote vai ser capital. En casa é onde peor porcentaxe de tiro teñen. É rechamante. É un equipo para estar moito máis arriba do que agora está. É un equipo que lle leva máis arrincar. Están a xogar con 12 xogadoras, involucrar a 12 leva máis tempo que facelo con 6-7. Van atopando unha regularidade”.
“Destaco delas o colectivo. Rotan moito, o que lles permite unha alta intensidade defensiva que é onde elas fundaméntanse. A través de transicións rápidas, un xogo coral e os posteos dos treses son un equipo moi regular durante todo o partido”, explicba o adestrador do Durán Maquinaria Ensino, Antonio Pernas.
A importancia de gañar fóra
“A clasificación está moi igualada. Conta cada partido”, apuntaba Antonio Pernas ante os medios de comunicación.
Para o adestrador do equipo lucense, “gañar sería unha lombeirada importante. Imos partido a partido.. Gañar fóra xa non é que puntúe dobre, xa puntúa ata triplo. Sacar esa vantaxe fóra de casa sería importante”.
Explicaba Antonio Pernas que a intención é “centrármonos en facer un partido serio. Temos o recordo da última saída a Tenerife onde o equipo competiu dunha maneira moi regular. Queremos volver ter esas sensacións. Queremos controlar o partido desde atrás, que nos custou moito con Valencia. Non dominabamos o partido atrás, correr, non faciamos boas transicións… Dependiamos moito do xogo en estático, do cinco contra cinco. Queremos unha boa defensa, controlar o rebote, que nos permita correr, controlar as transicións e facer un xogo máis alegre”.
Pero o Durán Maquinaria Ensino non xoga so na cancha. Enfronte estará un Cadí La Seu que aínda non venceu na súa casa. “Imaxínome que quererán puntuar e gañar o primeiro partido”, declaraba Antonio Pernas. “Nós imos tentar xogar con esa ansiedade que poidan chegar a ter. Xogan entre semana e imaxino que os desprazamentos poden afectar. É un bo partido para recuperar sensacións e oxalá puntuar xa que a liga está tan igualdada que son moi importante os partidos de fóra”.
Esperanza sen presión é o que se extrae das verbas de Antonio Pernas sobre este choque en Lleida: “Temos ilusión de que as cousas vaian saíndo, que gañemos, vernos arriba e poder optar a outras cousas, pero tamén é poñernos moito na mochila agora mesmo. Pero imos xogar contra un equipo serio. Oxalá nolo traiamos e podamos pensar en cotas maiores”.
