Antía Pérez é unha das catro galegas que recibiron a chamada da seleccionadora Clàudia Pons para integrar a Selección Española de fútbol sala feminino de cara á disputa do Campionato de Europa. Esta será a súa primeira vez no torneo continental cuxo título defende España como vixente campioa.
A galega Antía Pérez, catro veces internacional, estará no seu primeiro Europeo tras un longo calvario de lesións
“Aos seus 22 anos, chega a este Campionato de Europa como a xogadora con menos partidos coa Selección Española ás súas costas, pero cunha experiencia vital no fútbol sala que lle fai valorar a experiencia doutra maneira. Ao pouco de cumprir os 18 anos rompeu o ligamento cruzado do xeonllo esquerdo nos Xogos Olímpicos da Mocidade. Xusto un ano despois, sufriu a mesma lesión na outra xeonllo”, lembran desde a Real Federación Española de Fútbol RFEF.
Antía Pérez: “Ter a oportunidade de estar aquí é algo incrible”
Agora xa deixou atrás ese particular calvario e vai gozar de estar nun Europeo. “Xogar un Europeo é sempre un plus. Ter a oportunidade de estar aquí é algo incrible ao que todas aspiramos”, recoñece a galega Antía Pérez á RFEF.
Aínda que estivo en varias convocatorias coa Selección Española absoluta de fútbol sala, o seu debut non chegou ata o pasado mes de febreiro diante da Selección de Arxentina. Fronte a Portugal, na semifinal de hoxe venres (16.00, Teledeporte) , cumprirá o seu quinto encontro como internacional. “Levo moito tempo traballando para poder chegar a isto tras dúas lesións moi longas e verme aquí agora é un plus de motivación e de enerxía para seguir crecendo”, comenta.
Sobre a súa experiencia, Antía Pérez, relata á RFEF: “Tiven unha moi mala serie, estiven mal e tiven que levantar cabeza, que ao final é complicado con 18 e 19 anos. Saír do bucle negativo é difícil e iso faiche madurar máis rápido que outras persoas. Quedo con iso, coa aprendizaxe”.
