Xa é oficial. A galega Antía Jácome representará a España nos Xogos Olímpicos de Toquio 2021 na modalidade C1 200 de piragüismo. A padexeira disputou un selectivo contra a madrileña María Corbera, vencendo na proba e facéndose co billete olímpico.
Ambas deportistas disputaron dúas probas este xoves no complexo deportivo David Cal, en Verducido (Pontevedra), unha delas ás 10:00 horas e a outra ás 12:25 horas.
Jácome, pertencente á Escuela de Piragüismo Ciudad de Pontevedra, tivo que competir nesta regata ante a Corbera, do Club de Piragüismo de Aranjuez, tras acadar praza para a embarcación no Preolímpico.
Na primeira proba, a pontevedresa fíxose coa vitoria por 00:01,280 segundos de diferenza, rematando a proba en 00:47,831. Cunha segunda vitoria nunha segunda regata moi rifada, a praza olímpica é súa.
Con esta clasificación, a galega é a primeira piragüista da ECPC en acudir a unha cita olímpica, á que viaxará con outra galega, Tere Portela, quen competirá no K1 200.
