Antía Chamosa é unha das promesas e, ao mesmo tempo, realidades, do atletismo galego. A marchadora, pertencente á Sociedad Gimnástica de Pontevedra non deixa de sumar éxitos nunha tempada que, pese a ser atípica pola convivencia de competicións e adestramentos coa pandemia de COVID-19, seguramente no seu caso individiual, poida considerarse de moito éxito. Con todo, aínda ten retos por diante e plantexa que: “O Campionato de Europa Sub-23 é o gran obxectivo este ano”
Aló polo mes de febreiro, Antía Chamosa anotaba o seu nome na historia do atletismo estatal. A galega batía a mellor marda española da historia para a categoría Sub-23, á que aínda pertence. De aí que falemos dela como presente, pero tamén como futuro e grande promesa da marcha galega.
O 14 de febreiro, unha data que moita xente lembra por outros moitos, quedará gravada na mente desta pontevedresa do 1999 para sempre. Disputou o Campionato Absoluto de Marcha de 35km, foi quinta no global pero primeira Sub-23 e tumbou a marca cun crono de 2:58:22. Xa daquela a deportista admitía a súa sorpresa polo tempo acadado “Cando mirei a marca, non o podía crer!”, declaraba daquela.
Aquela proba en terras de Sevill na que Antía Chamosa foi quinta, houbo tal nivel, que María Perez García, do Valencia Atletismo, vencía batendo o récord de España que ostentaba Ainhoa Pinedo González cun tempo de 2:53:43. A nova campioa absoluta estatal acadaba parar o reloxo nos 2:44:17. As tres primeiras clasificadas fixeron tempos que melloraban o récord de España vixente ata esta fin de semana nesta proba. Así que pódese dicir que a nosa raíña galega da marcha non lle perdeu o paso a unhas marcas épicas nunha competición que será lembrada por anos.
No seu club, a Sociedad Gimnástica de Pontevedra facíanlle unha entrevista xusto antes da competición na que esta fin de semana se proclabama campioa Sub-23 no estatal de marcha 20km e batía o récord galego coa súa mellor marca.
Antía Chamosa proclámase campioa Sub-23 no Campionato de marcha 20km
Nesa conversa miraba máis aló desta proba e rememoraba a proba dos 35 quilómetros de Sevilla na que fixo historia. “Foi unha competición que non preparei especificamente. Ademais diso nunca fixera unha distancia tan longa, saín controlándome, buscando sensacións de menos a máis e cun pouco de medo de non terminar. En xeral atopeime moi ben tanto de pernas como de cabeza, a pesar dos problemas estomacais, xa que vomité dúas veces durante a competición”.
Aquela era a primeira vez que Antía Chamosa competía nos 35 quilómetros. Así que o seu foi, claramente, chegar e encher xa que, como decimos fixo a marca española Sub-23 da historia e foi quinta de España absoluta. Ela mesma admite que todo o acontecido nesa competición foi: “Incrible que despois de todo o esforzo da distancia, os vómitos e planeando case no último mes que ía realizar o 35km, chegar e baixar do tres horas. O obxectivo era saír a gozar sen pensar en marcas, polo que non podo estar máis contenta co resultado”.
Afronta os 5, 10, 20, 35 km, os que lle boten
Antía podería ser unha das marchadoras seleccionada para a Copa de Europa de Marcha, un logro que a colocaría no presente máis presente da marcha estatal. Consultada sobre que suporía para ela o feito de competir con xente que admira atléticamente falando, a Chamosa explicaba: “Competir con atletas de categoría absoluta dáme moitísima motivación para o futuro. O ano que vén xa paso de sub23 a esa categoría e hai moito nivel. Ademais, este ano é ano olímpico e están todas moi fortes. Pola miña banda irei sen presión, a seguir collendo experiencia nesta nova distancia e sobre todo gozar da carreira”.
A deportista da Sociedad Gimnástica Pontevedra apuntaba na conversa entre os seus obxectivos máis inmediatos: “En pista empezarán competicións con distancias máis curtas, en 5km e 10km, e gustaríame baixar marca en ambas as distancias. Tamén seguirei preparando o 20km no caso de que me clasifique ao Campionato de Europa Sub-23, que é o gran obxectivo deste ano.
Antía Chamosa adestra en Pontevedra e Barcelona
Os adestramentos desta marchadora están da cabalo entre dous puntos da xeografía española. Vai de punta a punta da Península. Por un lado está Galicia con Pontevedra como epicentro. A Cidade do Lerez é a súa cidade natal e na que reside. E o outro punto de adestramento regular está no este, en Cataluña. Alí, Barcelona, a Cidade Condal, é o lugar onde se concentra para preparar as competicións e pulir a súa técnica coa súa adestradora, Monste Pastor.
A situación de pandemia por COVID-19 ten complicado nos seu momento os adestramentos de moitas deportistas, tamén no caso das atletas. Pero agora, Antía Chamosa apunta a unha situación máis normalizada. “Agora mesmo por sorte podo adestrar con normalidade, aínda que sexa máis complicado facer unha sesión no ximnasio, por exemplo”.
O que si admite é que “estas semanas en Pontevedra si foron un pouco complicadas. De feito, sentinme para realizar os adestramentos moito máis cómoda e tranquila en Barcelona, tanto a nivel de climatoloxía como coa situación do COVID-19”.
Segundo explica a deportista galega: “en Pontevedra, a pesar de non estar obrigada a levar máscara nos adestramentos, hai xente que me para adestrando e grítanme. Polo menos, tanto o meu irmán como eu, temos a sorte de contar co apoio de Ence, na súa bolsa de ‘Ence Plan Social’ que nos axuda e dános a oportunidade de adestrar en casa e de facer desprazamentos para contar cun feedback presencial da nosa adestradora”.
“Teño que dicir que en moitos adestramentos gozo da miña soidade, sobre todo en rodaxes longas, aínda que moitas veces facendo series si botei de menos ter un grupo. Por sorte teño ao meu pai e ao meu irmán, que a pesar de que vai moito máis rápido, acompáñame os primeiros quilómetros”. A marcha, como vemos é marca da casa nos Chamosa. O irmán de Antía, Daniel, tamén milita na Sociedad Gimnástica Pontevedra e é un destacado marchador.