A marchadora galega Antía Chamosa competirá o vindeiro 16 de maio na Copa de Europa de Marcha de Podebrady (República Checa) como parte do equipo da Selección Española. A proba da atleta da Sociedad Gimnástica de Pontevedra comezará ás 08:00 horas da mañá.
A pontevedresa participará nos 35 km no seu debut co combinado estatal en categoría absoluta. Este campionato continental será a súa oportunidade de iniciar o seu prometedor futuro como unha das mellores marchadoras españolas.
Antía Chamosa podería mellorar a súa marca
Chamosa competirá na mesma proba que Mar Juarez, pero por ser só dúas atletas non poderán computar como equipo. Con todo, a galega poderá mellorar a súa marca, a mellor española en categoría Sub-23 da historia, situada nas 2:58.22.
A cidade da Copa de Europa de Marcha poderá ser un talismán para a pontevedresa, xa que foi precisamente en Podebrady onde competiu na súa primeira Copa de Europa de Marcha por Equipos, cun primeiro posto en equipo e unha novena posición en individual.
Antes deste campionato, Chamosa xa acadou a marca mínima para competir no Campionato de Europa sub23, previsto entre o 8 e o 11 de xuño en Bergen (Noruega).
