Moi boas novas para o balonmán galego. O Club Balonmán Porriño segue anunciando as súas renovacións. Esta vez tocoulle á zona central, e é que Anthia Espiñeira decidiu renovar un ano máis co club porriñés.
A central galega chegou ao club a tempada pasada desde o Mecalia Atlético Guardés e revelou nunha entrevista con club porriñés o porqué da súa renovación “creo que a tempada pasada, non puidemos chegar a demostrar todo o noso traballo e teño unha espinita cravada. Están a expor un bo proxecto para a próxima tempada e, ademais, quédame un ano de estudo e prefiro acabalo aquí.” e sinala o cómoda que sente “síntome moi cómoda no club, tanto co corpo técnico como coas miñas compañeiras, facilitáronme moito o adaptarme a este equipo e axudáronme a volver confiar en min e a volver gozar”.
Anthia Espiñeira, xogadora do Orbe Porriño: “Creo que a tempada pasada, non puidemos chegar a demostrar todo o noso traballo e teño unha espiña cravada”.
O corpo técnico amosa a súa ledicia pola renovación da central
Ante a renovación da súa xogadora o técnico do equipo, Ismael Martínez, revelou como recibiu a noticia “É moi boa noticia, alégranos moito. Cremos que este ano renderá moito mellor, xa que coñece o sistema, ás xogadoras… É unha moza moi importante para o grupo por todo o que nos achega, tanto dentro como fóra”. Ademais, engade a súa visión cara a nova tempada “esperamos que veña a un nivel igual ou mellor do que fixo ata o de agora. Estamos moi contentos co seu labor.”
Ismael Martínez, adestrador do Orbe Porriño: “É moi boa noticia, alégranos moito. Cremos que este ano renderá moito mellor, xa que coñece o sistema, ás xogadoras…”
Renovación fundamental
O presidente do club, Abel Estévez, tamén quixo amosar a súa visión ante esta nova renovación: “Creo que é unha renovación fundamental para nós. É das poucas centrais puras da liga que ten moita calidade no seu xogo ofensivo. Cónstanos que tivo moitas e moi boas ofertas para irse a outros equipos, pero aceptou a nosa e para nós é fundamental”.
Abel Estévez, presidente do Orbe Porriño: “Creo que é unha renovación fundamental para nós. É das poucas centrais puras da liga que ten moita calidade”.
