Anna Escribano Navarro (Sabadell – 18/09/1999) convértese na última incorporación confirmada para o equipo de Primeira División Nacional Feminina FS do Viaxes Amarelle FSF nesta nova tempada 2020/2021. A xogadora catalá miliriu nas dúas últimas tempadas na Primeira División Nacional Feminina FS, primeiro no Femisport Palau e esta última tempada no Poio Pescamar FSF.
Anna Escribano, que está a piques de cumprir os 21 anos, é unha desas xogadoras moi novas pero que conta con ampla experiencia na competición nacional do fútbol sala; habitual da selección catalá, tanto en categoría Sub-17, coa que conseguiu o subcampeonato de España nos anos 2013 e 2016; como en categoría sub-20, onde conseguiu o campionato de España no ano 2019, precisamente contra a Selección Galega dirixida por Jorge Basanta. Agora o técnico galego a terá ás súas ordes.
Traxectoria deportiva de Anna Escribano
Antes de se converter no reforzo máis recente do Viaxes Amarelle FSF para a tempada 2020-2021, a deportista catalá ten acumulado unha interesante traxectoria no cinco contra cinco.
Escribano iniciou a súa carreira deportiva no CN Sabadell na tempada 2012/2013; para posteriormente, na tempada 2013/2014 fichar polo CD Concordia, onde se mantivo durante tres tempadas, nas que conseguiu o Campionato de Liga Autonómica de Cataluña no ano 2014/2015 e posterior ascenso á Segunda División Nacional Feminina FS.
Na tempada 2016/2017 pasa a fichar polo Femisport Palau na Segunda División Nacional Feminina FS, clasificándose para xogar o play-off de ascenso, aínda que sen poder conseguilo nesa tempada, e quedou subcampioa da Copa Cataluña de futsal.
Xa na tempada 2017/2018, dando continuidade no Femisport Palau consegue o campionato de Liga de Segunda División Nacional Feminina FS, e conseguen o ascenso á Primeira Division Nacional Feminina FS, na que milita co conxunto catalán durante a tempada 2018/2019.
Xa a tempada 2019/2020, a xogadora catalá pasa a formar parte do persoal do Poio Pescamar FSF, que terminou a tempada na quinta posición da xeral de Primeira División Nacional Feminina FS.
Escribano: “A mocidade non é un hándicap, só unha perspectiva diferente”
A nova incorporación ás laranxas di afrontar a súa chegada ao equipo coruñés coma un “reto persoal”. Na súa cabeza está “poder volver recuperar sensacións e atoparme como xogadora despois dunha tempada tan atípica en todos os sentidos”.
Escribano explicaba logo de facerse pública a súa chegada ao Viaxes Amarelle FSF que desexa “seguir formándome e crecendo tanto como xogadora e persoa”.
Anna Escribano, xogadora do Viaxes Amarelle FSF: “Quero seguir formándome e medrando tanto como xogadora e persoa”
Consultada ao respecto da media de idade do conxunto herculino, que será unha das máis novas da Primeira División, a futbolista desboutou que iso poidese supór un contratempo. “Creo que ser mozo nunca é un hándicap, senón unha perspectiva diferente. O rango de evolución dun equipo novo sempre é maior, con iso, sumar as ganas de competir”.
Anna Escribano, xogadora do Viaxes Amarelle FSF: “O rango de evolución dun equipo con xente nova é sempre é maior, con iso, sumar as ganas de competir”
Tamén significou que esa mocidade das futbolistas do club que adestra Jorge Basanta pode ser “fisicamente un gran plus e un gran aspecto a potenciar, como tamén a proxección individual de cada xogadora e de todo o bloque. Creo que as miñas compañeiras e o corpo técnico son conscientes diso e imos saber sacar o máximo rendemento”.
Anna Escribano, xogadora do Viaxes Amarelle FSF: “Non coñecía a Jorge Basanta persoalmente, pero todas as referencias que tiña del eran moi boas e ese foi un motivo importante para vir aquí”
Jorge Basanta suma a súa terceira tempada á fronte do banco do Viaxes Amarelle FSF. Anna Escribano admite que non o coñecía “persoalmente, pero todas as referencias que tiña del eran moi boas e ese foi un motivo importante para vir aquí”, admitiu.