- Anna Caplice reforzará ao CRAT Residencia Rialta para a segunda volta da liga Iberdrola de rugby.
A irlandesa foi internacional co seu país ata o 2021 e pode xogar de defensora, de flanker ou de número 8. Esta última sexa, probablemente, a posición en que a xogue no CRAT Residencia Rialta, pois Jos, Pakito e Juan Carlos necesitan cubrir a ausencia de Sina Hetet.
“Espero crecer como xogadora, continuar aprendendo e tamén compartir a miña experiencia de rugby coas miñas compañeiras e os meus adestradores”, afirma a irlandesa acerca das súas expectativas no seu novo destino.
Con 33 anos, Anna Caplice militou nas filas de Munster en Irlanda, Eastern Suburbs en Australia e Richmond, Harlequins e Gloucester en Inglaterra. Natural de Mallow, no Condado de Cork, Caplice suma un total de 14 partidos como internacional irlandesa nos que anotou 10 puntos. Comezou no rugby no seu Mallow natal aos dezasete anos aínda que o seu primeiro equipo senior foron os Bohemians da Universidade de Limerick.
Mide 168 centímetros, pesa 80 quilogramos e asegura sentirse “feliz de xogar en calquera posición de terceira liña”.
Como internacional, Anna Caplice estreouse no equipo de sevens nas Series Mundiais de Dubai en 2013. Co XV do trevo debutou en 2016 fronte a Canadá. Pouco despois foi seleccionada con Irlanda para disputar o Mundial de 2017 no cal o seu país era o anfitrión. Tamén participou no Seis Nacións desde 2018 ata 2021.
A experiencia de Anna Caplice en Galicia sumará un selo máis a un pasaporte moi viaxado. Gradudada en idiomas pola Universidade de Limerick e cun posgrao en linguas modernas por St. Mary’s College, viviu en Arxentina, Austria, Xapón, Australia e Inglaterra. Fala inglés, castelán, alemán, xaponés, francés e, por suposto, gaélico irlandés, o idioma non vai ser un problema.
Nos Harlequins, exerceu ademais como responsable de desenvolvemento deportivo para o club londiniense. Anna Caplice é embaixadora da campaña de Rugby Players Ireland chamada Take Your Feelings (placa os teus sentimentos). Ademais, Caplice foi membro dos Barbarians, unha selección das mellores xogadoras do mundo, en 2019.
Anna Caplice participou no Open Dubai Sevens este mes, onde saíu campioa co equipo Rhinos. A nova xogadora do CRAT Residencia Rialta chegará á Coruña a comezos de xaneiro. Como case todos os seus compatriotas, practicou deportes gaélicos na infancia, concretamente fútbol gaélico e camogie. “Son deportes fantásticos. Traerei uns paus de camogie comigo a Galicia”, ameaza.
Anna Caplice chega para sumar efectivos a un CRAT mermado
A chegada desta xogadora internacional irlandesa é considerada “moi necesaria para sumar efectivos no CRAT“, polo club coruñés. Ás baixas para o que resta de tempada de Sina Hetet, lesionada e xa en Nova Zelandia, e Estela, que regresou a Valencia por motivos persoais, únese a da capitá Ceci, que se vai a Alemaña por motivos laborais. As coruñesas esperan que as lesionadas que aínda non puideron xogar esta tempada regresen pronto ao terreo de xogo.
