- “Buscabamos ofrecer ese lugar para practicar deporte, desfrutar e exercer o balonmán”
- “O obxectivo é que compitan, aprendan, que sigan desenvolvéndose como xogadoras”
Na tempada 2018/2019 A Coruña vía como nacía un novo club de balonmán na cidade. O Balonmán Brigantium, centrado en formentar o deporte feminino, botou a andar con equipos en categoría base e, tres anos despois da súa creación, contará cun equipo sénior para competir na categoría autonómica.
Falamos con Dani Angériz, director deportivo do club coruñés, que define co obxectivo de “estrutura” e non competición, ao centrarse en dar cabida ás nenas que queiran xogar ao balonmán chegadas á idade adulta.
-As Nosas: Con que obxectivo nace o Balonmán Brigantium?
Dani Angériz: Os nosos primeiros equipos eran infantil e cadete, con xogadoras que estaban entre 1º e 4º da ESO. Co paso dos anos van medrando e o obxectivo inicial era ter unha estrutura completa onde todas as xogadoras que quixeran empezar, tiveran un lugar onde xogar cando foran adultas.
O que ocorría é que non había ningún club feminino en A Coruña que ofrecera un lugar onde quedarse, e moitas xogadoras bailaban constantemente dun club ao outro. Había situacións complicadas onde as xogadoras, cando chegaban aos 18 anos, non podían xogar máis porque non podían, non tiñan un lugar. Independentemente dos obxectivos deportivos, de chegar a unha categoría ou nivel, nós o que buscabamos era ofrecer ese lugar para practicar deporte, desfrutar e exercer o balonmán.
Dani Angériz: “O obxectivo principal do club era este. Que as nenas pequenas foran crecendo e tiveran un lugar onde desfrutar e xogar.”
Desde o minuto un nós buscábamos isto, unha estrutura completa. O obxectivo principal do club era este. Que as nenas pequenas foran crecendo e tiveran un lugar onde desfrutar e xogar.
Ver esta publicación en Instagram
A.N.: E por que creades o equipo sénior con vistas á próxima tempada?
Dani Angériz: Este é o primeiro ano no que a nosa primeira xeración de xogadoras pasa a sénior. É o momento idóneo para iniciar o equipo. Non temos todas as xogadoras, teñen que ser 11 fichas e non todas as nosas xogadoras poden partir da base xuvenil. Suben 7 ou 8, estamos esperando a ver que ocorre coa selectividade e os estudos, pero sempre haberá algunha incorporación nova que xa se está producindo.
A.N.: Como accede un equipo recentemente creado á competición autonómica?
Dani Angériz: A categoría autonómica en balonmán é a máis baixa. Hai poucos equipos e non hai competición local, porque hai poucos clubs. Así que a mínima é a autonómica neste caso. Nesta división hai moito desprazamento e moitos gastos e costes e todos os equipos son de nivel. Pero unha vez creas o equipo e tes estrutura, podes acceder á categoría autonómica sen ningún problema.
Dani Angériz: “O noso obxectivo non é deportivo, é que aprendan”
A.N.: Que obxectivos vos marcades para este novo conxunto?
Dani Angériz: Deportivo ningún. Que compitan, aprendan, que sigan desenvolvéndose como xogadoras. Seguir aprendendo e desfrutar deste deporte. Pouco máis se pode pedir. A partir de aí, as tempadas vindeiras, cando sigan subindo xogadoras, cando poidamos completar máis o equipo, cando teñan máis experiencia, veremos a onde chegar. Polo de pronto, continuar.
A.N.: Tedes a vista posta nos posibles clubs rivais?
Dani Angériz: Hai equipos con xogadoras con moita experiencia, con xogadoras con 30-35 anos, como pode ser Cañiza ou Salceda. Equipos con experiencia, que teñen un fluxo constante de xogadoras desde hai anos de categorías inferiores, polo que compites con bancos moi completos e con equipos preparados e experimentados.
Dicir un ou outro é mi complicado. En toda Galicia hai equipos moi fortes que aspiran á segunda división española. Logo hai outros que están empezando como nós, que teñen as xogadoras xustas e están gañando experiencia. Depende de como se distribúa a próxima tempada se nunha división ou en dous, polo número de clubs participantes. O periodo de inscrición remata a finais de verán.
A.N.: Como conformaredes o plantel do primeiro equipo?
D.A.: As xuvenís son as que suben, que o ano que vén serán sénior. Así, teremos ás sénior de primeiro ano e subiremos á marxe a xuvenís que terán dobre ficha, que xogarán na súa categoría xuvenil e tamén na sénior.
Aínda non podemos facer público as fichaxes, porque o estamos falando. Hai seis ou sete xogadoras que teñen intención, pero aínda non o podemos confirmar porque non puxemos todas as condicións sobre a mesa. Xa temos fixas ao menos a sete xogadoras e esperamos que outras cinco ou seis. Pero non podo asegurar o número exacto.
A.N.: Poderíase destacar algún nome a nivel individual?
D.A.: Na pasada tempada, as porteiras fixeron un gran traballo. Irene e Marina foron o núcleo do equipo para mantelo a flote na maioría dos partidos. Se non tiña o día unha, tíñao a outra. Co cal sempre dependemos moito da portería nese aspecto.
A.N.: Pola idade das xogadoras, entendo que a maioría delas estudan. Como se traballa cun equipo que non pode adicarse ao 100% a adestrar?
D.A.: Como fai todo o mundo, con paciencia. Haberá momentos de exames ou laboratorios que teñan e non podan vir a adestrar, porque están metidas nunha clase ata as 9 da noite. Intentaremos compaxinar como se poidan os adestramentos xuvenís e sénior.
Haberá algunhas que estean en Santiago e verán os venres a adestrar e competir o sábado. Buscaríamos outra forma de adestramento alternativa para adestrar en Santiago neste caso. Tirar de aí. Cos adestramentos conxuntos entre xuvenil e sénior chegar a un gran número de xogadoras e competir a toda pista. A ver como se estrutura dependendo dos horarios de pista.
A.N.: Supoño que aos hándicaps habituais na creación dun equipo, tivechedes que sumar este ano a pandemia
D.A.: Si, non foi nada fácil. Estamos apostando moito desde o club, porque é unha inversión enorme de recursos económicos e deportivos e traballamos durante varios anos para aforrar e chegar ata este punto. Que aínda enriba o facemos en pandemia? Pois é o que toca.
Dani Angériz: “Estamos apostando moito desde o club, porque é unha inversión enorme e traballamos durante varios anos para aforrar”
A.N.: Coa creación deste equipo sénior, dise que sodes as herdeiras do desaparecido Balonmano Coruña. Tedes algún tipo de relación con ese club?
D.A.: Non temos ningunha vinculación. Recordo que ao principio mandamos unha carta de presentación e saúdo, pero a nosa directiva e o noso plantel non ten ningún nome común co Balonmano Coruña. Isto de tomar o relevo dise publicamente, sempre no lo dixeron: “ides coller o relevo”.
Dani Angériz: “(O Balonmano Coruña) é un referente e ogallá cheguemos a ser algún dia algo parecido do que foron elas”
Elas eran un equipo de nivel, que tiña moitos anos de experiencia, nós estamos empezando, e o que compartimos é a cidade e o lugar de traballo. Non temos ningunha relación administrativa, pero é un referente e ogallá cheguemos a ser algún dia algo parecido do que foron elas. Polo de agora contentámonos con seguir medrando.
