Andrea Feijóo, futbolista do Ourense Envialia, xa ten diagnóstico da súa lesión e non é alentador. Trátase dunha rotura do ligamento cruzado anterior, do menisco interno e tamén unha escordadura do ligamento lateral interno. Resumindo: terá que pasar por quirófano e, salvo milagre, vaise perder o que resta de tempada.
O seu xeonllo dereito mancouse no partido que o Ourense Envialia xogaba hai unhas semanas na Coruña no pavillón da Sagrada Familia ante o Viaxes Amarelle. A deportista tivo que deixar a cancha e seguiu o resto do choque, no que venceu o seu equipo, desde o banco con xeo sobre a zona afectada.
A lesión de Andrea súmase ás de Sara Moreno e Uxía
Antes desta lesión de Andrea Feijóo, o Ourense Envialia xa tivo que lamentar a de Sara Moreno, que previsiblemente a terá apartada da competición cinco meses, e a de Uxía que ten unha lesión no ligamento cruzado.
O adestrador, Morenín, lamentaba precisamente ao final do último partido das ourensás (xustamente o da lesión de Andrea Feijóo), o infortunio que estaban a ter coas baixas este curso.
