O talento do CW Pontevedra sobrepasa fronteiras. Dúas das súas canteiras, Andrea Andión e Izaskun Tellería, competiron nesta tempada co club portugués Paredes Polo Aquático, na Liga da Primera División lusa.
Malia a súa idade, sendo xuvenil e cadete respectivamente, ambas xogadoras competiron ao máximo nivel no país veciño. O pasado domingo, 23 de maio, despedíronse da tempada disputando o último partido da competición. Á fin do presente curso, o Paredes rematou na cuarta posición.
Dobre esforzo de Andión e Tellería nesta tempada
As galegas compaxinaron os seus adestramentos co CW Pontevedra cos correspondentes ao Paredes. De luns a venres, Andión e Tellería traballaban coas súas compañeiras no seu club e os venres, ao remate da xornada escolar, viaxaban a Portugal para realizar os últimos adestramentos co equipo luso e disputar os partidos correspondentes.
Todo isto nun curso marcado pola pandemia de COVID-19 e co peche de fronteiras, que puideron pasar pola súa acreditación de deportistas profesionais. A modo de anécdota, nunha ocasión as dúas xogadoras tiveron que agardar media hora a que as autoridades comprobaran as súas acreditacións no posto de control da fronteira.
No apartado deportivo, a posibilidade de competir ao máximo nivel na liga lusa supuxo un extra de motivación tanto para Andrea Andión como para Izaskun Tellería. Desde o punto de vista persoal, segundo apuntan desde o CW Pontevedra, o sacrificio e esforzo individual e familiar nun ano no que tiveron que compaxinar estudos e deporte ao máximo, serviulles de aprendizaxe e autocoñecemento dos límites e capacidades potenciais.
As canteiras do equipo galego puideron poñer en valor os seus logros e a súa determinación para acadar os obxectivos, superando as adversidades das circunstancias.
Ademais, a tempada aínda non rematou, xa que as galegas poderán disputar nos meses de xuño e xullo dúas novas competicións co Paredes: a Taça de Portugal de Polo Aquático e a liga feminina sub23.
Referentes no CW Pontevedra
O seu club, o CW Pontevedra agarda que a experiencia destas dúas xogadoras “poida servir de referencia e sexa un espello no que o resto de waterpolistas de todas as categorías do club, tanto femininas como masculinas, poidan verse refrexadas”.
O equipo expresa que o seu desexo é que o resto de deportistas poida ver que “con traballo, ilusión e empeño é posible acadar metas maiores e loitas polos seus soños”.
